Afg‘oniston va Pokiston chegarasidagi munosabatlar yana keskinlashdi. Pokiston armiyasi Afg‘oniston poytaxti Kobulga havo hujumi uyushtirdi, deb xabar bermoqda Amaj News. Ma’lumotlarga ko‘ra, poytaxtning Taymani tumanidagi bir necha nishonlarga harbiy samolyotlar orqali kamida to‘rtta raketa bilan zarba berilgan.
Bu hujum ikki davlat o‘rtasidagi so‘nggi yillardagi eng xavfli holatlardan biri sifatida baholanmoqda. Reuters agentligi “Tolibon” vakiliga tayanib xabar berishicha, chegaradagi to‘qnashuvlar oqibatida kamida 12 nafar tinch aholi halok bo‘lgan, 100 dan ortiq kishi yaralangan.
“Tolibon” harakatining bayonotida ta’kidlanishicha, jangni Pokiston boshlagan, afg‘on kuchlari esa bunga javoban “ko‘plab pokistonlik askarlarni” yo‘q qilgan va ularning postlarini egallab olgan. Pokiston hukumati esa, aksincha, hodisa uchun javobgarlikni “Tolibon” zimmasiga yukladi va o‘z hududida to‘rt nafar tinch aholi yaralangani haqida ma’lum qildi.
Ikki qo‘shni davlat o‘rtasidagi bu ziddiyatning ildizi bir necha hafta oldin boshlangan. 9 oktyabr kuni “Tolibon” bilan bog‘liq “Tahriki Tolibon Pokiston” harakati Qurram chegara okrugidagi harbiy konvoyga hujum qilgan. 10 oktyabrda esa Pokiston Kobulda guruh yetakchilaridan biriga raketa zarbasi bergan. Ortidan “Tolibon” chegara postlariga javob hujumi uyushtirgan.
Analitiklar fikricha, Afg‘oniston va Pokiston o‘rtasidagi bu yangi keskinlik mintaqadagi xavfsizlik vaziyatini yanada murakkablashtirishi mumkin. Chegara hududlaridagi harbiy to‘qnashuvlar nafaqat ikki davlat, balki butun Markaziy va Janubiy Osiyo barqarorligi uchun jiddiy xavf tug‘dirmoqda.
Shunday qilib, Kobulga berilgan bu zarba ikki davlat munosabatlarida yangi inqiroz bosqichini boshladi — vaziyatning qay tomonga burilishi hozircha noaniq.
“Zamin”ni Telegramʻda oʻqing!
