18-oktyabr kuni AQSH bo‘ylab millionlab fuqarolar mamlakat prezidenti Donald Trampning siyosiy yo‘nalishiga norozilik bildirish uchun ko‘chalarga chiqdi, deb xabar berdi Reuters.
Tashkilotchilar ma’lumotiga ko‘ra, mamlakatning turli hududlarida 2700 dan ziyod miting bo‘lib o‘tgan. Eng yirik norozilik harakatlari Vashington, Nyu-York va Chikagoda to‘plangan. Barcha yig‘inlarda jami 7 millionga yaqin kishi ishtirok etgani aytilmoqda.
Namoyishchilar qo‘llarida Amerika bayroqlari va turli shiorlar yozilgan plakatlar bilan chiqishdi: “Qirolga yo‘q”, “Amerikani milliarderlar o‘ldirmoqda”, “Rejimdan qutuling”, “Monarxiya emas — demokratiya”. Ushbu so‘zlar mitingning umumiy kayfiyatini — erkinlik va xalq boshqaruvi uchun chaqiriqni ifoda etdi.
Reuters yozishicha, norozilik aksiyalari tinch yo‘sinda o‘tdi. Ularda faqat yoshlar emas, balki keksalar, bolali oilalar ham qatnashgan. Hech qanday zo‘ravonlik yoki hibs holatlari qayd etilmagan.
Namoyishlar tashabbuskori bo‘lgan Indivisible tashkiloti hammuassisi Li Grinberg mitinglar haqida shunday dedi:
«Amerikalik uchun “Bizda qirollar yo‘q” deyishdan va tinch norozilik bildirish huquqidan foydalanishdan muhim narsa yo‘q».
Kuzatuvchilarning fikricha, ushbu mitinglar faqat bir kunlik norozilik emas, balki Trampning keyingi siyosiy harakatlariga bo‘lgan chuqur norozilikning ko‘rinishi hisoblanadi. Jumladan, immigratsiyani cheklash bo‘yicha harbiy choralar, milliy gvardiyani shaharlarga joylashtirish va siyosiy raqiblarga nisbatan jinoiy ta’qiblar bu fuqarolarda katta tashvish uyg‘otgan.
Tramp esa bu harakatlarni “jinoyatchilikka qarshi kurash va milliy xavfsizlikni mustahkamlash choralari” deb asoslab kelmoqda. Shu bilan birga, Respublikachilar partiyasi norozilik namoyishlarini “Amerikaga nafrat qo‘zg‘ovchi mitinglar” deb atadi.
Mitinglar davlatning bir qator ijtimoiy dasturlarini vaqtincha to‘xtatib qo‘ygan hukumat yopilishi fonida o‘tdi. Bu esa yuz minglab davlat xizmatchilari ishsiz qolgan vaziyatda xalqning norozilik kayfiyatini yanada oshirdi.
Bu galgi chiqishlar iyun oyida bo‘lib o‘tgan shunga o‘xshash aksiyalardan keyingi ikkinchi yirik to‘lqin hisoblanadi. Amerika jamoatchiligi fikricha, bu mitinglar orqali mamlakat aholisi o‘z demokratik huquqlarini yana bir bor eslatdi.
Qizig‘i shundaki, namoyishlar kechayotgan vaqtda prezident Tramp Floridada golf o‘ynash bilan band bo‘lgan. Bu holat ham ko‘pchilik tomonidan siyosiy ramz sifatida baholandi — xalq ko‘chada, rahbar esa hordiqda.
Shunday qilib, Amerikadagi ommaviy noroziliklar mamlakat siyosiy hayotida yangi bosqichni boshlab berdi. Millionlab fuqarolarning ovozi mamlakatda demokratiya va erkinlik yo‘lidagi kurash hali yakunlanmaganini yodga soldi.
“Zamin”ni Telegramʻda oʻqing!
