Janubiy Koreyada jamoatchilikni larzaga solgan va butun mamlakatni g‘azabga keltirgan jinoyat bo‘yicha sud hukmi chiqarildi. Sud 8 yoshli qizaloqni shafqatsizlik bilan pichoqlab o‘ldirgan maktab o‘qituvchisiga umrbod ozodlikdan mahrum etish jazosini tayinladi.
Ma’lumotlarga ko‘ra, 48 yoshli Myon Je Van joriy yilning fevral oyida o‘zining shogirdi — Kim Xe Nul ismli 8 yoshli qizaloqni maktabdagi sinf xonasiga aldash yo‘li bilan olib kirib, unga pichoq bilan hujum qilgan. Bu mudhish hodisa butun mamlakatda shok va g‘azab uyg‘otgan edi.
Prokurorlar ayblanuvchi uchun o‘lim jazosini talab qilgan, chunki jabrlanuvchining oilasi ham eng og‘ir jazo qo‘llanilishini so‘ragan. Biroq sud bu talabni qondirmadi, sababi ayblanuvchi ruhiy holati zaif bo‘lgani uchun “jinoyat takrori xavfi bor, lekin o‘lim jazosiga loyiq emas” degan xulosaga kelgan.
Myon Je Van sudda o‘z aybini to‘liq tan oldi va “butun umri davomida qilgan ishidan pushaymon bo‘lib yashashini” aytdi. Shu bilan birga, u jinoyat sodir etilgan paytda ruhiy kasallik bo‘yicha davolanish jarayonida bo‘lganini, ya’ni ruhiy bosim ostida ekanini ta’kidladi.
Tergov jarayonida ma’lum bo‘lishicha, Myon voqeadan bir necha kun oldin ham agressiv xatti-harakatlar ko‘rsatgan, hatto bir hamkasbiga hujum qilishga uringan. Shu sababli maktab rahbariyati unga nisbatan tekshiruv boshlagan edi. Ammo u o‘sha kunning o‘zida pichoq xarid qilib, maktabga olib kirgan va o‘zi bilan bir bolani o‘ldirishni ham rejalashtirganini keyinchalik tan olgan.
Qizaloq o‘qishdan keyin uyiga qaytmaganidan keyin, uning ota-onasi politsiyaga murojaat qilgan. Qidiruv natijasida bola maktab binolaridan birida pichoqlangan holda topilgan. Ayblanuvchining bo‘ynida ham jarohat izlari aniqlangan, politsiya buni o‘z joniga qasd qilishga urinish deb baholagan.
Sud qaroriga ko‘ra, Myon nafaqat umrbod qamoq jazosiga, balki 30-yil davomida elektron kuzatuv bilaguzuk taqib yurish majburiyatiga ham hukm qilindi.
Mamlakat rasmiylari hodisadan so‘ng maktablarda xavfsizlik choralarini kuchaytirishni, psixologik tekshiruv va o‘qituvchilar uchun ruhiy salomatlik nazoratini majburiy qilishni muhokama qilmoqda.
Bunday hodisa Janubiy Koreyada so‘nggi yillarda ta’lim tizimidagi psixologik bosim, ruhiy salomatlik va jamoat xavfsizligi haqida jiddiy mulohazalarni yanada kuchaytirdi.
“Zamin”ni Telegramʻda oʻqing!
