Rossiyaning Vologda va Volgograd viloyatlarida oxirgi kunlarda energetik tarmoqlarga qilingan yangi hujumlar aholi va rasmiylar orasida jiddiy xavotir uyg‘otdi. Rasmiy ma’lumotlarga ko‘ra, hujumlar asosan mamlakatning yirik elektr ta’minot markazlariga qaratilgan.
Vologda viloyatidagi “Belozerskaya” nomli yirik podstansiya hujumga uchragani ma’lum qilindi. Bu obyektning quvvati 3 gigavolt-amperni tashkil etadi va u Vologda, Cherepoves hamda bir qator yirik sanoat korxonalarini elektr energiyasi bilan ta’minlab turadi. Hujumdan so‘ng bir necha soat davomida ayrim tumanlarda elektr ta’minoti uzilib qolgani aytilmoqda.
Volgograd viloyatida esa vaziyat yanada keskin bo‘ldi. Bu yerda 1523 megavolt-amper quvvatga ega “Balashovskaya LEP” podstansiyasi hujum nishoniga aylandi. Ma’lumotlarga ko‘ra, mazkur obyekt so‘nggi bir oy ichida ikkinchi marta zarbaga uchragan.
Volgograd viloyati gubernatori Andrey Bocharovning ma’lum qilishicha, hozirda qurilish-ta’mirlash brigadalari Kikvidzen, Uryupin, Novonikolayev va Novoannin tumanlarida elektr ta’minotini tiklash ishlarini olib bormoqda.
“Hozir asosiy e’tibor aholi yashaydigan hududlarni tezkorlik bilan energiya bilan ta’minlashga qaratilgan. Barcha xizmatlar tinimsiz ishlayapti”, — deb yozdi gubernator o‘zining Telegram sahifasida.
Energetik tizimlarga qilingan bu hujumlar Ukraina tomonidan amalga oshirilgani taxmin qilinmoqda. So‘nggi haftalarda Kiyev ham Rossiyaning uzluksiz raketalar va dronlar orqali Ukraina energetika obyektlariga bergan zarbalarga javob sifatida Moskva hududidagi infratuzilmalarga hujumlarni kuchaytirganini yashirmayapti.
Ukraina prezidenti Volodimir Zelenskiyning so‘zlariga ko‘ra, mamlakat mudofaa salohiyatini oshirib, ukrain ishlab chiqaruvidagi raketalar yordamida Rossiyaning strategik obyektlariga zarbalar geografiyasini kengaytirish rejalashtirilgan. Ammo, bu galgi hujumlarda raketalar qo‘llanilgan-qo‘llanilmagani haqida aniq ma’lumot yo‘q.
Saratov shahrida ham dron hujumi natijasida bir necha binolar va avtomobillar zarar ko‘rdi. Gubernator Roman Busarginning ma’lumoticha, hodisa paytida ikki kishi o‘rta darajada jarohat olgan.
Rossiya Mudofaa vazirligi esa 7-noyabr kuni ertalab mamlakatning yetti mintaqasi ustida 82 ta ukrain droni yo‘q qilinganini bildirdi. Ammo Vologda viloyati ushbu ro‘yxatda tilga olinmagan. Shuning uchun necha dron nishonga yetib borgani yoki qaysi obyektlarga zarba berilgani hozircha aniqlanmagan.
Muttaxassislar fikricha, Rossiyadagi so‘nggi energetik hujumlar qish mavsumi arafasidagi asosiy strategik xavflardan biri bo‘lib qolmoqda. Energiya ta’minotidagi har qanday uzilish nafaqat aholining turmushiga, balki sanoat faoliyatiga ham jiddiy ta’sir ko‘rsatishi mumkin.
Hozirda hukumat idoralari va xavfsizlik xizmatlari energetik infratuzilmani muhofaza qilish choralarini kuchaytirayotgani ma’lum qilindi. Shu bilan birga, Rossiyaning energetik tizimi yanada barqaror bo‘lishi uchun ehtimoliy hujumlarga qarshi yangi texnologiyalar joriy etilishi kutilmoqda.
“Zamin”ni Telegramʻda oʻqing!
