Eronda tanilgan ayol sport murabbiyi Xaniya Shariati Rudposhti jamoat oldida ro‘molsiz holda akrobatik tryuklar namoyish etgani uchun qo‘lga olindi, deb yozadi “Iran International”.
Manbalarning ma’lum qilishicha, hodisa ommaviy kiyinish qoidalariga zid deb topilgan ko‘cha chiqishi ortidan yuz bergan. Sportchi mahalliy aholi oldida boshi yopilmagan holda gimnastik harakatlar bajargani uchun “islomiy me’yorlarni buzgan” deb hisoblangan.
Norvegiyada joylashgan Hengau inson huquqlari tashkiloti tarqatgan ma’lumotga ko‘ra, Shariati 9-noyabr kuni kechqurun xavfsizlik xizmatlari tomonidan hibsga olingan. Uning oilasi bilan faqat qisqa telefon orqali suhbat qilishga ruxsat berilgan, ammo sportchining aniq joylashuvi hali ham ma’lum emas.
Ma’lumotlarga ko‘ra, Xaniya Shariatining ijtimoiy tarmoqlardagi sahifalari, jumladan, qariyb 160 ming obunachiga ega Instagram akkaunti hozirda xavfsizlik idoralari tomonidan nazorat ostida.
So‘nggi kunlarda Eron hukumatining yuqori darajadagi mansabdorlari jamoat joylaridagi kiyinish qoidalariga bo‘ysunmaslikka qarshi keskin chora ko‘rish lozimligini ta’kidlamoqda. Eron bosh prokurori Muhammad Muvahhidi Ozodning ta’kidlashicha, “islomiy kiyinish” talablariga amal qilish nafaqat qonun talabidir, balki diniy burch sifatida ham ko‘riladi.
Qonunga ko‘ra, ayollar mamlakatda ommaviy joylarda boshlarini yopib yurishlari shart, biroq ayrim faollar bu talabni shaxsiy erkinlikka tajovuz deb baholamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
