Saudiya Arabistoni Isroil bilan munosabatlarni tiklash uchun asosiy shart sifatida Falastin davlatiga rasmiy e’tirof berishni talab qilmoqda. Bu haqda falastinlik amaldorlar ma’lum qilgan.
Ularning aytishicha, Riyod Isroildan munosabatlarni normallashtirish masalasida shoshilmasligini bildirgan. Saudiya hukumatiga ko‘ra, amalda premer-ministr Binyamin Netanyaxu va uning hukumatidagi keskin o‘ng qanot vakillari — Betsalel Smotrich hamda Itamar Ben-Gvir — hokimiyatda turgan bir paytda siyosiy yaqinlashuv imkoniyatdan yiroq.
Shu bilan birga, Saudiya Arabistoni munosabatlarni tiklash uchun Falastin davlati tashkil etilishini aniq belgilab beradigan, amaliy qadamlarga ega rejani talab qilmoqda. Riyodning fikricha, bu mintaqa barqarorligi uchun asosiy omil hisoblanadi.
Isroil esa BMT Xavfsizlik Kengashining G‘azo bo‘yicha yangi rezolyutsiyasi loyihasidan norozi. Hujjat falastinliklarning o‘z mustaqil davlatini barpo etish huquqini ta’minlaydigan shart-sharoitlar yaratishni nazarda tutadi. Bir qator isroillik vazirlar bu kabi davlat hech qachon barpo bo‘lmasligini ta’kidlab, loyihaga keskin qarshi chiqdi.
Yaqin Sharqdagi vaziyat yanada keskinlashar ekan, Saudiya va Isroil o‘rtasidagi diplomatik jarayon Falastin masalasi hal qilinishiga bevosita bog‘liq bo‘lib qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
