Tailandning Latkrabang tumanida joylashgan ma’muriy binodagi hojatxonada yangi tug‘ilgan qizcha tirik holda topildi, deb xabar berdi Daily Mail nashri. Ushbu holat binoning uchinchi qavatida joylashgan hojatxonada ro‘y berdi.
Tozalovchi ayol hojatxonadan bola yig‘isini eshitib, darhol ishchini chaqirgan. Qopqoqni ochgan ishchi hojatxonaning pastki qismida yangi tug‘ilgan chaqaloq yotganini ko‘rgan. Bu chaqaloq atigi bir kunlik bo‘lib, hali ona tomonidan hech qanday yordam ko‘rsatilmagan.
Politsiya kapitani Kritsada Saykxong bergan ma’lumotga ko‘ra, chaqaloq darhol Sirindxorn shifoxonasiga yetkazilgan. Shifokorlar uning ahvoli yaxshi ekanini, tanasida jarohatlar yo‘qligini tasdiqlashdi. Qizchaning vazni 2,7 kilogrammni tashkil qiladi.
Hozirda huquq-tartibot idoralari bolani hojatxonaga tashlab ketgan shaxsni aniqlash bo‘yicha surishtiruv olib bormoqda. Tergovchilar binodagi kuzatuv kameralari orqali so‘nggi soatlarda hojatxonaga kirgan har bir kishining harakatlarini o‘rganmoqda.
Politsiya ushbu voqeani og‘ir jinoyat sifatida baholab, gumonlanuvchini topish uchun barcha imkoniyatlarni ishga solmoqda. Ayni vaqtda chaqaloq ijtimoiy xizmatlar nazoratiga o‘tkazilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
