Vashington, Kiyev va Moskva o‘rtasida aylanib yurgan yangi “tinchlik rejasi” oxirida yana juda katta shov-shuvga sabab bo‘ldi. Oq uy matbuot kotibi Kerolayn Livittning ta’kidlashicha, Donald Tramp taklif qilgan hujjat har ikki tomon uchun ham “mantiqan mos va qabul qilsa bo‘ladigan” variant bo‘lishi ko‘zda tutilgan. U brifingda bu reja bir oydan beri maxfiy ravishda ishlab chiqilayotganini, muhokamalarda prezidentning maxsus vakili Stiv Uitkoff hamda davlat kotibi Marko Rubio faol qatnashganini aytdi.
Ular Ukraina hamda Rossiya bilan to‘g‘ridan to‘g‘ri muloqot qilib, har ikki tomonning pozitsiyalarini o‘rgangan. Ammo Livitt hujjatning to‘liq sharhini bermadi — chunki reja hali oxirgi ko‘rinishni olmagan va unga qator o‘zgartishlar kiritilishi mumkin.
Zelenskiy esa o‘zining kechki videomurojaatida Ukraina va AQSH jamoalari “urushga nuqta qo‘yish uchun kerak bo‘ladigan bandlar ustida ishni davom ettirayotganini” bildirdi. AQSH armiyasi vaziri Deniyel Driskoll esa 20-noyabr kuni Kiyevda bo‘lgan uchrashuvda rejaning nusxasini Zelenskiyga shaxsan topshirgani aytildi. Axios’ning yozishicha, ikki tomon hujjatni “juda qisqa fursatda” tayyorlab, uzil-kesil shaklga keltirishda kelishib olgan.
Zelenskiy idorasi ma’lumotiga ko‘ra, Ukraina rahbari uchrashuvda mamlakat uchun eng muhim bo‘lgan tamoyillarni ochiq bayon qilgan va rejaga kiritiladigan har bir band “adolatli va munosib yakun” bo‘lishi shartligini ta’kidlagan. Ya’ni Kiyevning pozitsiyasi ochiqcha: urushni to‘xtatish mumkin, ammo bu Ukraina manfaatlariga zid bo‘lmasligi kerak.
Shu bilan birga, Oliy Rada deputati Aleksey Goncharenko kechqurun 28 banddan iborat hujjatni ommaga e’lon qildi va bu Tramp ma’muriyatining tinchlik rejasi ekanini da’vo qildi. Bir nechta ukrain OAV ham hujjatni chop etdi, ammo hozircha Vashington tomonidan rasmiy tasdiq yo‘q. Rejaning haqiqiyligi noma’lum, ammo jamiyatdagi qiziqish va savollar tobora kuchayayotgani aniq.
Hozirgi vaziyatda eng katta intriga — AQSH, Ukraina va Rossiya o‘rtasida qanday siyosiy kelishuv muhokama qilinayotgani va bu kelishuv amalda qay darajada reallashishi mumkinligida. Vashington “hamma uchun mo‘tadil” deb baholagan hujjat Kiyev jamoatchiligida turlicha tasavvur uyg‘otyapti, shu bois bo‘lajak qarorlar Ukrainada ham, xalqaro maydonda ham jiddiy bahslarga sabab bo‘ladi.
Aniq narsa — kelasi haftalarda bu mavzu yanada dolzarblashadi va har bir yangi ma’lumot urushning keyingi bosqichini belgilab berishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
