Qozog‘istonning Mang‘istau viloyatida yovvoyi tabiat bilan bog‘liq hayratlanarli va bir oz xavotirli voqea yuz berdi. Qishloq maktabining ikki o‘quvchisiga tulkilar tomonidan hujum qilingani haqida “Nur.kz” tarqatgan ma’lumotlar jamoatchilik e’tiborini o‘ziga tortdi.
Viloyat Sog‘liqni saqlash boshqarmasi bergan izohlarga ko‘ra, 21-noyabr kuni ikki qator maktab o‘quvchisiga noma’lum hayvon hujum qilgan. Bolalar ota-onalari hamrohligida shoshilinch tarzda Beyneu markaziy tuman shifoxonasining tez tibbiy yordam bo‘limiga yo‘llanadi. Keyinchalik aniqlanishicha, hujumga sabab bo‘lgan jonzot — korsak tulkisi bo‘lgan.
Travmatologlarning dastlabki xulosalariga ko‘ra, 2011-yilda dunyoga kelgan bolaning o‘ng oyoq boldir qismida, 2018-yilda tug‘ilgan bolaning esa chap oyog‘ida tirnalish va tishlash izlari kuzatilgan. Shu zahotiyoq ikkala bolaga ham jarrohlik yo‘li bilan tegishli tibbiy ko‘mak berildi, zarur profilaktik emlashlar o‘tkazildi. Ayni damda ularning holati qoniqarli deb baholanmoqda va ambulator kuzatuv ostida saqlanmoqda.
Ekolog Odilbek Qo‘zibaqovning ta’kidlashicha, yovvoyi hayvonlar quturish kabi xavfli xastaliklarni tashuvchisi bo‘lishi mumkin. Shu bois, bunday jonzotlarga yaqinlashish, ular bilan muloqotga kirishish juda xatarli hisoblanadi. Uning so‘zlariga ko‘ra, agar kimdir tasodifan yovvoyi hayvon bilan to‘qnash kelsa, darhol tegishli idoralarga xabar berishi, hayvon tishlagan hollarda esa darhol tibbiy muassasaga murojaat qilishi lozim.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
