Britaniya, Germaniya va Fransiya rasmiylari AQSH tomonidan Ukraina bo‘yicha taqdim etilgan yangi tinchlik rejasini ko‘rib chiqar ekan, hujjatning mazmuni ularni jiddiy hayratga soldi. Der Spiegel xabar berishicha, reja ilk ko‘rinishida yevropaliklar uchun maqbul emas va G20 sammiti doirasida bir nechta ittifoqchi davlatlar bu masala yuzasidan tezkor ravishda o‘z pozitsiyalarini kelishib oldi.
Ma’lumotlarga ko‘ra, Germaniya va Ukrainaga eng yaqin turadigan boshqa sheriklar Tramp taklif qilgan 28 bandli rejaning joriy variantini qo‘llab-quvvatlamaydi. Ular hujjatni tubdan qayta ishlash zarurligini ta’kidlamoqda. Yevropa davlatlari tomonidan tayyorlangan o‘z takliflari hamda qayta ishlangan loyiha allaqachon Vashingtonga yuborilgan, ammo tafsilotlar oshkor etilmagan.
Yevrokengash raisi Antoniu Koshta Yevropa Ittifoqi tinchlik jarayonini qo‘llab-quvvatlashini aytdi, biroq Tramp taklif etgan tinchlik rejasi bandlari bilan tanishganda, ularning ko‘pchiligi jiddiy tahrir talab qilishini bildirdi. Shu munosabat bilan u barcha 27 yetakchini Yevropa Ittifoqi — Afrika Ittifoqi sammiti chog‘ida Ukraina masalasiga bag‘ishlangan maxsus yig‘ilishda ishtirok etishga chaqirdi.
Yevropaliklar, Kanada va Yaponiya yetakchilari esa avvalroq rejada mustahkam tinchlikka erishish uchun muhim uch-to‘rtta element borligini tan olgan, ammo ayni paytda katta xavotir uyg‘otuvchi bandlar ham yetarli ekanini ta’kidlagan edi. Eng muhimi — Donbass va Qrim kabi hududlarni Rossiyaga tegishli deb tan olish taklifini ular mutlaqo qabul qilmaydi.
Xulosa sifatida, AQSHning taklifi Yevropa uchun asos bo‘lishi mumkin, ammo hozirgi ko‘rinishda uni amalga oshirish imkonsiz. Ittifoqchi davlatlar tinchlik jarayonini to‘g‘ri yo‘lga qo‘yish uchun hujjatni qayta ishlashni davom ettirishga qaror qilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
