Rossiya qo‘shinlari Shanbaga o‘tar kechasi yana Ukraina hududlari bo‘ylab ommaviy zarbalarni amalga oshirdi. Mahalliy rasmiylarning ma’lum qilishicha, uchuvchisiz qurilmalar va aviabombalar orqali amalga oshirilgan asosiy hujumlar Kiyev va uning viloyatiga qaratilgan. Shuningdek, Dnipro va Xarkiv shaharlarida ham kuchli portlashlar qayd etilgan.
Kiyevda turar joylar nishonga olindi
Kiyev shahar harbiy ma’muriyatining xabar berishicha, dronlar poytaxtning kamida to‘rt tumanidagi turar joy binolariga kelib tushgan. Shevchenko va Solomyon tumanlarida 14 va 25 qavatli uylar, xususiy sektor va avtomobillar shikastlanib, yong‘inlar kelib chiqqan. Kiyev meri kamida yetti kishi, jumladan 13 yoshli o‘smir jarohatlanganini bildirdi. Brovar tumanida ham ikki kishi jabrlangan.
Hujumdan oldinroq Ukraina Havo kuchlari Xarkiv bo‘yicha zarbalar haqida xabar bergan, unda boshqariladigan bombalar qo‘llangan. Keyinroq Xarkiv viloyatidagi Dergachyov tumani ma’muriyati rahbari zarbalar energetika infratuzilmasiga ham zarar yetkazganini tasdiqladi.
Tinchlik rejasi va Putinning sharti
Shunday og‘ir hujumlar fonida, noyabr o‘rtalarida AQSH prezidenti Donald Trampning tinchlik rejasi haqida xabarlar tarqaldi. Dastlab Moskva talablariga yaqin bo‘lgan bu rejaga Ukraina va AQSH Jenevada o‘tkazgan maslahatshuvlardan so‘ng o‘zgartirishlar kiritildi. Kutilishicha, yangilangan hujjatda Rossiyaning hududiy masalalari ko‘tarilmaydi va u dekabr boshida Moskvaga taqdim etiladi.
Bunga qaramay, Rossiya prezidenti Vladimir Putin Ukraina qurolli kuchlari Moskva "o‘ziniki" deb tan olgan Donbassdagi pozitsiyalaridan chekinma gunca, hujumlar davom etishini ma’lum qilib, o‘z pozitsiyasini o‘zgartirmasligini bildirdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
