Rossiyada WhatsApp messenjeri atrofida jiddiy vaziyat yuzaga kelmoqda — platforma mahalliy qonun talablariga to‘liq rioya qilmasa, mamlakat hududida umuman ishlamay qolishi mumkin. Bu haqda Rossiya aloqa, axborot texnologiyalari va ommaviy kommunikatsiyalar sohasi ustidan nazoratni amalga oshiruvchi federal xizmat — Roskomnadzor rasman ma’lum qildi.
WhatsApp’ga nisbatan qo‘llanilayotgan cheklov choralari bosqichma-bosqich kuchaytirilmoqda. Sabab sifatida messenjer Rossiya hududida jinoyatlarni oldini olishga qaratilgan qonun normalarini bajarmayotgani ko‘rsatilgan.
Roskomnadzor versiyasiga ko‘ra, platforma terrorchilik harakatlarini uyushtirish, ijrochi va ishtirokchilarni yollash, shuningdek, fuqarolarga qarshi firibgarlik va boshqa turdagi jinoyatlarda foydalanilayotgani aytilgan. Shu bois xizmat messenjerni nazoratga olib, cheklovlarni kengaytirishga majbur bo‘lgan.
Ma’lumotda ta’kidlanishicha, cheklovlar bosqichli tarzda joriy etilyapti — bu esa foydalanuvchilarga boshqa messenjerlarga o‘tib olish imkonini beradi. Agar WhatsApp Rossiya qonunchiligi talablarini bajarishdan bosh tortsa, to‘liq bloklanishi muqarrar.
WhatsApp’dagi qo‘ng‘iroqlar sifati avgust oyidan beri sezilarli ravishda yomonlashgandi. Oktyabrda Roskomnadzor rasman messenjer faoliyatini qisman cheklaganini aytgan va buni jinoyatchilarga qarshi kurash zarurati bilan izohlagan. 28-noyabr kuni ham mamlakat bo‘ylab, ayniqsa Moskva shahrida, servisda jiddiy uzilishlar, xabar yuborishda kechikishlar, foto va video jo‘natishda qiyinchiliklar kuzatilgan.
WhatsApp Rossiyada eng ommabop messenjerlardan biri hisoblanadi. Google Play ma’lumotlariga ko‘ra, u “Aloqa” toifasidagi ilovalar orasida beshinchi o‘rinda turibdi. Mediascope’ning 2025-yil oktyabr tahlillariga qaraganda, Rossiyada WhatsApp auditoriyasi 96,2 million foydalanuvchini tashkil etsa, Telegram 91 million kishiga yetgan.
WhatsApp’ning Rossiyada to‘liq bloklanishi haqidagi muhokamalar 2024-yildan buyon davom etmoqda. Davlat Dumasi qo‘mitasi rahbari Sergey Boyarskiy o‘tgan yil dekabrda bu haqdagi ovozalarni “mish-mish” deb atagan va masala bo‘yicha ehtiyotkor fikr bildirishga chaqirgan edi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
