AQSH taklif etgan 28 banddan iborat tinchlik formulasi Ukraina bilan o‘tkazilgan qator muzokaralardan keyin qayta ko‘rib chiqilib, 20 bandgacha qisqartirildi. Bu haqda Ukraina prezidenti Volodimir Zelenskiy Londondan Bryusselga yo‘l olayotgan samolyot bortida jurnalistlar savollariga WhatsApp orqali javob bergan vaqtida ma’lum qildi.
Zelenskiyning ta’kidlashicha, avvalgi variantda Kiyev manfaatlariga zid bo‘lgan bir qator bandlar bor edi. Yangilangandan so‘ng ular to‘liq chiqarib tashlandi.
«28 ta band bor edi, endi 20 ta bo‘ldi. Biz bu yo‘nalishni o‘zgartirdik. Ukraina manfaatlariga qarshi bo‘lgan hech bir qism qoldirilmadi. Amerikaliklar, umuman olganda, murosa variantlarini izlamoqda, biroq hududlarga taalluqli masalalarda hali yechim yo‘q», — dedi Zelenskiy.
Ukraina rahbari suhbat davomida Kiyev o‘z hududlaridan voz kechish niyatida emasligini qayta-qayta ta’kidladi:
«Ularni na konstitutsiya, na xalqaro huquq to‘ldirmaydi. Rossiya bizdan hududlardan voz kechishni talab qilyapti, lekin biz hech narsa bermaymiz — aynan shuning uchun kurashmoqdamiz», — deya keltiradi uning so‘zlarini ukrain nashrlari.
Zelenskiy xavfsizlik kafolatlari masalasiga ham to‘xtaldi. Uning ta’kidlashicha, Ukraina uchun eng ishonchli kafolatlarni AQSH berishi mumkin, biroq bu Budapesht memorandumi kabi «bo‘sh va’dalar» emas, Kongress tomonidan rasman tasdiqlanadigan hujjat bo‘lishi kerak.
Prezidentning aytishicha, tinchlik rejasini ishlab chiqish 9 dekabr kechga qadar yakunlanadi va yakunlangan hujjat AQSH tomoniga yuborish uchun tayyor bo‘ladi. Yevropalik maslahatchilar ham Ukraina bilan birga ish olib bormoqda.
4–6-dekabr kunlari Mayami shahrida Ukraina delegatsiyasi AQSH vakillari bilan muzokaralar o‘tkazdi. Uchrashuvlarda Ukraina MXMK kotibi Rustem Umerov, Bosh shtab rahbari Andrey Gnatov, AQSH tomonidan esa prezident Donald Trampning vakili Stiven Uitkoff va Oq uy rahbarining kuyovi Jared Kushner ishtirok etdi. Muzokaralarning uchinchi kuni Zelenskiy o‘zi ham onlayn tarzda qo‘shilib, «uzoq va mazmunli suhbat» o‘tkazganini ma’lum qildi.
Ko‘rinib turibdiki, tinchlik rejasining keyingi taqdiri AQSH va Ukraina o‘rtasidagi kelishuv darajasiga va, eng asosiysi, Kiyevning o‘z hududiy pozitsiyalaridan qaytmasligiga bog‘liq bo‘lib qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
