Ukraina prezidenti Volodimir Zelenskiy 12 dekabr, juma kuni Telegram kanali orqali Xarkiv viloyatidagi Kupyansk shahri kirish qismidagi stela yonida turib, videomurojaat e’lon qildi. Prezident muvaffaqiyatli harbiy harakatlar bilan shaxsan tabriklash uchun jangchilar yoniga kelganini bildirdi.
Zelenskiy: “Bugun — Kupyansk yo‘nalishi, bu yerda Ukraina uchun natijaga erishayotgan jangchilarimiz. Rossiyaliklar Kupyansk haqida ko‘p gapirgan edi — biz ko‘ryapmiz. Bordim, yigitlarni qutladim”.
Rossiya guruhi qurshovda
Shu kuni avvalroq Ukrain mudofaa kuchlari Kupyansk atrofida muvaffaqiyatli qarshi hujum amalga oshirib, shahardagi Rossiya guruhini qurshab olgani ma’lum bo‘ldi. Bu haqda “Ukrainskaya pravda” nashri Milliy gvardiyaning “Xartiya” qidiruv-zarba guruhi 2-korpusi qo‘mondonligi va DeepState OSINT loyihasi xaritasiga asoslanib xabar berdi.
“Xartiya” 2-korpusi qo‘mondoni Igor Obolenskiy vaziyatni quyidagicha izohladi:
“Vazifa shaharga kirib, rossiyaliklardan tozalash edi. Biz bir vaqtning o‘zida 2–3 yo‘nalishda ishladik, ularning logistikasini kesib tashladik. Bugun ayta olamizki, rossiyaliklar shaharda to‘liq uzib qo‘yilgan. Ular qurshovda ekanini endi tushunishyapti”.
Ozod qilingan hududlar
“Xartiya” 2-korpusi taqdim etgan ma’lumotlarga ko‘ra:
- Kondrashovka qishlog‘i va uning atrof hududlari, shuningdek o‘rmonlar to‘liq ozod etilgan.
- “Xartiya”ning 13-brigada guruhi Radkovka qishlog‘i va uning atrofini to‘liq ozod etgan.
- Ular Kupyansk shimolidagi shaharning o‘zida ham bir necha o‘nlab uydan dushmanni siqib chiqargan.
Obolenskiyning qo‘shimcha qilishicha, hozirda Rossiya QK bor zaxiralarini tashlab, mudofaani yorib o‘tishga urinmoqda, ammo ular yo‘q qilinmoqda. Shuningdek, janglarda Suriya va Afrika mamlakatlaridan bo‘lgan ko‘plab xorijlik jangarilar qayd etilgan.
Jangdagi talafotlar va yo‘qotishlar
Milliy gvardiyaning 2-korpusi ma’lumotiga ko‘ra, bir necha oy oldin Rossiya qo‘shinlari Oskol daryosidan 6 km ichkariga kirib kelgan, ammo 22-sentyabrdan 12-dekabrgacha bo‘lgan davrda “Xartiya” bo‘linmalari Rossiyaning katta kuchlarini tor-mor etgan:
- Yo‘q qilingan harbiylar: 1027 nafar rossiyalik harbiy.
- Yaralanganlar: 291 nafar.
- Asirga olinganlar: 13 nafar “okkupant”.
Qo‘mondonlik shahar markazidagi janglar hali davom etayotganini, ammo Kupyansk keyinchalik to‘liq ozod etilishini ma’lum qildi.
DeepState OSINT loyihasi xaritasida ham Kupyanskning butun shimoli-g‘arbiy chekka qismi Rossiya harbiylaridan tozalangani tasdiqlangan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
