Ukraina prezidenti Vladimir Zelenskiy Rossiya, Ukraina va Qo‘shma Shtatlar delegatsiyalari 23 yanvar kuni Birlashgan Arab Amirliklarida ilk uch tomonlama maslahatlashuvni o‘tkazishini ma’lum qildi. Uning ta’kidlashicha, gap “texnik darajadagi” muloqot haqida ketmoqda va bu format ish bersa, muammolarni muhokama qilishda muhim qadamga aylanishi mumkin.
Uch tomonlama format nima beradi?
Zelenskiyning fikricha, shunday uchrashuvlarning o‘ziyoq ijobiy signal: tomonlar kamida ishchi darajada aloqa kanallarini ochiq ushlab turishi mumkin. Bu esa, odatda, keyingi bosqichda kattaroq qarorlar uchun “yo‘l xaritasi” tayyorlashga xizmat qiladi. Reuters avvalroq ham Ukraina AQSH taklif qilgan uch tomonlama muzokaralar g‘oyasini natija bersa qo‘llab-quvvatlashini yozgan edi.
Uitkoff safarlari va muzokaralar zanjiri
Bu voqealar fonida AQSH prezidentining maxsus vakili Stiv Uitkoffning Moskvaga tashrifi ham kun tartibida. Reuters xabariga ko‘ra, u Rossiya rahbariyati bilan muloqotlar doirasida urushni to‘xtatish bo‘yicha yondashuvlar muhokamasini davom ettirgan va keyingi manzillar sifatida mintaqaga oid uchrashuvlar ham tilga olingan.
23 yanvardagi uchrashuv ikki kun davom etishi aytilmoqda. Agar tomonlar texnik masalalarda ham umumiy til topa olsa, keyingi bosqichda siyosiy darajadagi muloqot uchun maydon ancha “tayyor” holatga keladi. Bu yerda asosiy intriga bitta: gaplar ko‘p, natija qanchalik tez ko‘rinadi — shunisi hal qiladi.
“Zamin”ni Telegramʻda oʻqing!
