6 fevral tongida O‘mon poytaxti Maskat shahrida AQSH va Eron delegatsiyalari ishtirokidagi muzokaralar boshlangani xabar qilindi. Erondagi Mehr axborot agentligiga ko‘ra, uchrashuvlar O‘mon tashqi ishlar vaziri vositachiligida, bilvosita formatda ketmoqda.
Manbalarda aytilishicha, Eron delegatsiyasiga tashqi ishlar vaziri Abbos Aroqchi rahbarlik qilmoqda. AQSH tomonidan esa prezidentning maxsus vakili Stiv Uitkoff ishtirok etyapti, shuningdek Jared Kushner va Markaziy qo‘mondonlik rahbarlaridan biri ham tilga olingan.
Asosiy mavzu nima?
Muzokaralar markazida — Eronning yadroviy dasturi va sanksiyalarni yumshatish masalasi. Eron tomoni pozitsiyasi aniq: kun tartibi faqat yadro va sanksiyalar atrofida bo‘lishi kerak, boshqa mavzularni qo‘shishga tayyor emas.
AQSHda esa yondashuv kengroq: Vashington muzokaralar doirasida raketa dasturi, mintaqadagi guruhlar masalasi va ichki siyosat bo‘yicha ham muloqot bo‘lishini istashi aytilgan. Bu fikrni davlat kotibi Marko Rubio ham ochiq bildirgan — u yadro bilan birga boshqa yo‘nalishlar ham muhokama qilinishi lozimligini ta’kidlagan.
Nega bu uchrashuv shuncha “og‘ir”?
So‘nggi kunlarda axborot maydonida ziddiyatli xabarlar ko‘paygandi: 4-fevralda Axios manbalari kun tartibi bo‘yicha kelishmovchiliklar sabab muzokaralar bekor qilinganini yozgan, Tehron esa buni rasman tasdiqlamagani aytilgan.
Ustiga-ustak, muzokaralar arafasida AQSHning “Eronni zudlik bilan tark eting” degan chaqiruvi ham xavotirni oshirdi: Vashington o‘z fuqarolarini chiqish rejasini AQSH yordamiga bog‘lamaslikka da’vat qilgan.
Endi nima bo‘lishi mumkin?
Hozirgi holatda ikki tarafning “bir stol, ikki kun tartibi” bilan kelgani sezilyapti. Agar Maskatdagi muzokaralar faqat yadro va sanksiyalar bo‘yicha “minimal kelishuv”gacha yetib borsa ham, bu taranglikni pasaytirishga xizmat qilishi mumkin. Agar tomonlar mavzular bo‘yicha kelisha olmasa — bosim, bayonotlar va keskin ritorika yana kuchayishi ehtimoli katta.
Qisqasi, Maskatdagi uchrashuv — oddiy diplomatik protokol emas. Bu yerda har bir jumla ortida sanksiyalar taqdiri ham, mintaqadagi xavfsizlik ham, keyingi qadamlar ssenariysi ham turibdi.
“Zamin”ni Telegramʻda oʻqing!
