Amerikalik tadbirkor Ilon Mask Jefri Epshteyn ishi atrofida yana bir shov-shuvli bayonot berdi. U ijtimoiy tarmoqdagi chiqishida, ish bo‘yicha sudda ko‘rsatma berishga rozi bo‘lganlar (ayniqsa “haqiqatni aytdim” degani uchun sudlashuvga tortilishi mumkin bo‘lganlar) uchun advokat xarajatlarini qoplab berishga tayyorligini bildirgan.
Maskning ta’kidlashicha, agar kimdir ushbu ish yuzasidan rost gapirgani sababli da’vo yoki sud jarayoniga duch kelsa, uning huquqiy himoyasiga moliyaviy ko‘mak ko‘rsatadi. Shu yo‘l bilan u “haqiqatni aytishdan cho‘chiyotganlar”ni ruhlantirish niyati borligini ham ishora qilgan.
Shu bilan birga, tadbirkor “Epshteynning ehtimoliy mijozlari ro‘yxati” mavzusida ham savol qo‘yib, nima sababdan bu masala avvalroq AQSH Kongressi muhokamasiga kiritilmaganini so‘ragan.
Lekin shu yerda muhim nyuans bor: Associated Press va boshqa manbalarda FBI tomonidan “mijozlar ro‘yxati” degan alohida hujjat mavjud emasligi haqida xulosa keltirilgani aytiladi. Ya’ni, ayrim atamalar ijtimoiy tarmoqlarda tez “afsona”ga aylanib ketyapti — faktlar esa hali ham bahsli.
Eslatib o‘tamiz, Epshteyn ishi yillar davomida xalqaro rezonans uyg‘otgan: u voyaga yetmaganlarga nisbatan jinoyatlar bilan bog‘liq ayblovlar ortidan 2019 yili hibsga olingan, o‘sha yil avgustda qamoqda vafot etgan.
Maskning bu gaplari esa bitta narsani aniq ko‘rsatyapti: bu ish atrofidagi muhokama tezda so‘nmaydi. Qolaversa, kimdir sudda gapirishga qaror qilsa, endi “advokat puli qayerdan?” degan savol ham unchalik qo‘rqinchli bo‘lmasligi mumkin.
“Zamin”ni Telegramʻda oʻqing!
