Xitoy tashqi ishlar vaziri Vang I Yaqin Sharqdagi vaziyat nazoratdan chiqib ketmasligi va mojaro boshqa davlatlarga tarqalmasligi uchun zudlik bilan harbiy harakatlarni to'xtatishga chaqirdi. Pekinda o'tkazilgan brifingda diplomat ushbu muammoning kuch ishlatish orqali yechimi yo'qligini, aksincha, qurolli to'qnashuvlar yangi nafratni keltirib chiqarib, vaziyatni yanada murakkablashtirishini ta'kidladi. Bu haqda tengrinews.kz xabar beradi.
Vang I mintaqa davlatlari, jumladan Eronning suvereniteti va hududiy yaxlitligini hurmat qilish zarurligini qayd etdi. Uning so'zlariga ko'ra, kuch ishlatish buyuklik belgisi emas, begunoh odamlar esa urush qurboniga aylanmasligi kerak. "Kuchli har doim ham haq bo'lavermaydi, dunyo o'rmon qonunlariga qaytmasligi lozim", dedi vazir. Shuningdek, u mintaqa xalqlari o'z taqdirini o'zi belgilashi kerakligini, tashqi kuchlarning ichki ishlarga aralashuvi hamda rangli inqiloblarni qo'zg'ash urinishlari hech qachon qo'llab-quvvatlanmasligini qo'shimcha qildi.
Diplomat barcha tomonlarni muzokara stoliga qaytishga va kelishmovchiliklarni teng huquqli muloqot orqali hal etishga chaqirdi. Xitoy tomoni Yaqin Sharqni normal hayot iziga qaytarish va mintaqada barqarorlikni ta'minlash uchun global xavfsizlik tashabbusini amalga oshirishda hamkorlik qilishga tayyorligini bildirdi. Eslatib o'tamiz, 2025 yil 28 fevral kuni AQSH va Isroil Eron hududiga raketa zarbalarini berib, Eron oliy rahbari Ali Xomanaiyni yo'q qilgan edi. Bunga javoban Tehron Isroil va Fors ko'rfazidagi Amerika bazalariga hujum qilib, neft tashish uchun muhim bo'lgan Hormuz bo'g'ozini yopib qo'ydi.
“Zamin”ni Telegramʻda oʻqing!
