Yaqin Sharqdagi geosiyosiy vaziyat tobora tarang tus olayotgan bir paytda, Eronda keng ko‘lamli safarbarlik jarayonlari boshlangani haqida xabarlar tarqaldi. Tasnim va Mehr agentliklarining ma’lumotiga ko‘ra, bir milliondan ortiq fuqaro mamlakat janubiy hududlariga yo‘naltirilgan bo‘lib, ular ehtimoliy harbiy to‘qnashuvlarga tayyor holatga keltirilmoqda.
Ma’lum qilinishicha, rasmiy doiralar nafaqat mavjud harbiy tuzilmalarni faollashtirmoqda, balki ko‘ngilli ravishda xizmat qilishni istagan yoshlardan tushayotgan arizalar soni ham keskin ortib bormoqda. Xususan, Islom inqilobi qo‘riqchilari korpusi (IIQK), shuningdek, «Basij» xalq militsiyasi va muntazam armiya safiga qo‘shilish istagida bo‘lganlar ko‘paygani qayd etilmoqda.
Mutaxassislar ma’lumotiga ko‘ra, Eron qurolli kuchlari tarkibidagi umumiy faol harbiylar soni 600 mingdan 800 minggacha baholanadi. Bu tarkibga muntazam armiya — Artesh va Islom inqilobi qo‘riqchilari korpusi kiradi. Ayniqsa, IIQK elita harbiy tuzilma sifatida alohida o‘rin tutadi va uning safida 150 mingdan ortiq xizmatchi borligi aytiladi.
Shu bilan birga, IIQK tarkibidagi «Basij» kuchlari ham jiddiy resurs hisoblanadi. Unda 90 mingga yaqin faol a’zo va yuz minglab zaxiradagilar mavjud bo‘lib, zarurat tug‘ilganda bu ko‘rsatkich bir necha barobarga oshishi mumkin. Ayrim baholarga ko‘ra, umumiy safarbarlik salohiyati 10 million nafargacha yetishi ehtimoldan xoli emas.
Ayni paytda Qo‘shma Shtatlar tomonidan ham harbiy tayyorgarlik kuchaytirilayotgani haqida ma’lumotlar paydo bo‘lmoqda. Xususan, Pentagon 82-havo-desant diviziyasiga qarashli qariyb ikki ming nafar harbiyni Yaqin Sharqqa joylashtirish bo‘yicha buyruq bergani aytilmoqda.
Bundan tashqari, OAVlarda AQSH tomoni ehtimoliy quruqlik operatsiyasi doirasida Ho‘rmuz bo‘g‘ozi atrofidagi strategik orollarni nazoratga olish yoki blokada qilish ssenariylarini ham ko‘rib chiqayotgani qayd etilgan. Bu esa mintaqadagi vaziyatni yanada murakkablashtirishi mumkin.
Shu fondan kelib chiqib, Isroil ham o‘z xavfsizligini mustahkamlash choralarini ko‘rmoqda. Ma’lum bo‘lishicha, mamlakat 400 minggacha zaxiradagi harbiylarni safarbar qilish rejasini tasdiqlagan. Bu qaror «Hizbulloh» bilan bog‘liq tahdidlar va mintaqadagi umumiy beqarorlik bilan izohlanmoqda.
Qisqasi, hozirgi vaziyat har tomonlama jiddiy va ehtiyotkorlikni talab qiladi. Tomonlar o‘rtasidagi keskinlik diplomatik yo‘l bilan hal etilmasa, bu holat yanada katta mojaroga aylanib ketishi mumkin. Hozircha esa barcha nigohlar Yaqin Sharqdagi rivojlanayotgan voqealarga qaratilgan.
“Zamin”ni Telegramʻda oʻqing!
