Do’konga harid uchun kelgan kaliforniyalik homilador ayol shu yerning o’zida farzandini dunyoga keltirdi

Kaliforniyalik homilador ayol oziq-ovqat do’koniga tashrif buyurgan payti ona bo’lish baxtiga erishdi. Bu haqida do’kon bekasining ijtimoiy tarmoqlarga bergan ma’lumotlariga asoslangan holda “Life.ru” nashri xabar bermoqda.

Market sohibasi Issamar Sepulvedaning yozishicha, tug’ruq jarayonini uning o’zi va hayratdan shoshib qolgan oshpaz hamda qassob qabul qilib olishgan. Ularning barchalari bu holatni haqiqiy yangi yil mo’jizasi deya atashmoqda.

“Bizning kassachimiz 911 raqamiga qo’ng’iroq qildi, qassob bolani qo’lida ushlab turganda oshpaz kindikni kesish uchun qaychi izladi” deydi Sepulveda.

Uning aytilishicha, do’kon xodimlari chaqaloqning terisi siyohrang tusda ekanligini ko’rib, asabiylasha boshlaganlar. Qutqaruv xizmati esa bolaning bunday ko’rinishiga sabab uning sovqotib qolganlishi va uni zudlik bilan isitish kerakligini tushuntirib bergan. Shundan so’ng do’kon sohibasi bolani yopinchiqqa o’rab, isita boshlagan.

Yaxshilik “elchi”larining ushbu qahramonligi shu bilan o’z yakuniga yetmadi: do’kon rahbari Issamar Sepulveda tug’ilgan chaqaloqning onasi uni yetarli sharoitlar bilan ta’minlay olmasligi sabab bolakay uchun ijtimoiy tarmoqlarda kerakli buyumlar yig’ishga yo’naltirilgan kampaniyani boshlab yubordi.
“Zamin” yangiliklarini “Vkontakti”da kuzatib boring