“Yoqutiston mauglisi” yoxud o‘rmonda o‘tgan 10 kun...

To‘rt yoshli Karina Yoqutistondagi Olom qishlog‘ida onasi va buvisi bilan yashaydi. O‘sha kuni u uyda buvisi bilan qolgan, Sharik laqabli iti bilan o‘ynab yurgandi. Buvi uxlab qoldi, uyg‘onganida esa qizcha uyda yo‘q edi. Qizig‘i, kampir bundan xavotirga tushmadi. Qizning onasi ham, buvisi ham uni qo‘shni qishloqda turadigan otasi olib ketganligiga ishonishardi. Ota esa qizi buvisinikida ekanligidan ko‘ngli to‘q edi. Shu tarzda roppa-rosa to‘rt kun qizaloqni izlash fikri hech kimning xayoliga kelmadi. Qo‘shni qishloqdan otasi qizini ko‘rgani kelgandagina uning yo‘qolganligi ma’lum bo‘ldi.

Keyin esa qizni qidirish boshlandi. Qidiruv ishlariga yuzlab kishilar jalb etildi. Ammo hammasi behuda ketdi, o‘t-o‘lanlar baland, tunlari sovuq, buning ustiga atrofda bo‘ri va ayiqlar izg‘ib yuradi. Birdan Karina yo‘qolganining to‘qqizinchi kuni Sharik qishloqqa qaytdi. Aynan u odamlarni qizchaning oldiga boshlab bordi. Yigirma bir yoshli Artyom Borisov Karinani o‘tlar orasidan topdi. Qizchani vertolyotda kasalxonaga olib ketishdi.

– Karina judayam jasur ekan, – dedi qutqaruv xizmati psixologi Yekaterina Alekseyeva. – Biz undan shuncha kun davomida nima yeb, nima ichganini so‘raganimizda, u o‘rmondagi mevalarni terib yeganini va daryodan suv ichganini aytdi.

Karinani qishloqdoshlari “Yoqutiston mauglisi” deb atashmoqda.

Manba: mulohaza.uz “Zamin” yangiliklarini “Facebook”da kuzatib boring