Turkiyada Nissan sobiq rahbarining Yaponiyadan qochishi doirasidagi ish bo‘yicha yetti kishi hibsga olindi

^{Foto: AFP}
Turkiyada Renault va Nissan kompaniyalari sobiq rahbari Karlos Gon Yaponiyadan Livanga Istanbul orqali qochishi bo‘yicha qo‘zg‘atilgan tergov ishi doirasida yetti kishi hibsga olindi. Bu haqda Daily Sabah gazetasiga tayanib Kun.uz xabar berdi.

Qo‘lga olinganlarning to‘rt nafari uchuvchilardir, deb yozadi gazeta. Avvalroq Yaponiya prokuraturasi Gonning Tokiodagi uyida tintuv o‘tkazgani xabar qilingandi.

31 dekabr kuni Fransiya, Braziliya va Livan fuqaroligiga ega bo‘lgan Gon Livanga kelgani ma’lum bo‘lgandi.

OAV ma’lumotlariga ko‘ra, Gon Yaponiyani 30 dekabrda tark etishga muvaffaq bo‘lgan. Uning Tokiodagi uyiga yollanma shaxslar guruhi yangi yil bilan tabriklash bahonasida musiqachilar ko‘rinishida kirib, uni musiqa asbobi g‘ilofida olib chiqib ketishgan. Yaponiya xavfsizlik xodimlari shubhali hech narsa sezishmagan.

So‘ngra Gon kichikroq aeroportga olib borilib, u yerdan Turkiyaga, so‘ngra xususiy samolyotda Livanga uchib ketgan. Gon Yaponiya chegarasini qonuniy ravishda kesib o‘ta olmagan, chunki uning Livan, Fransiya va Braziliya pasportlari uning advokatlarida bo‘lgan.

Ma’lum qilinishicha, Livanda Gon prezident Mishel Naim Aun bilan uchrashib, davlatdan xavfsizlik kafolatini olgan. Ta’kidlanishicha, Livan fuqaroligiga ega bo‘lgan Nissan’ning sobiq rahbari Livanda katta hurmatga ega. Bundan tashqari, Livan va Yaponiya o‘rtasida ekstraditsiya haqida kelishuv yo‘q.

Yaponiyada moliyaviy firibgarliklarda ayblangan Gon 2018 yil kuzida hibsga olinib, 2019 yil martida garov puli evaziga ozodlikka chiqarilgan. Unga Yaponiyani tark etish va rafiqasi bilan muloqot qilish taqiqlangan edi. U Yaponiyada 80 mln dollarlik daromadni yashirishda ayblanmoqda. “Zamin”ni Telegramʻda oʻqing!