«Saddam Husayn qatl etilishini oldindan bilardi, lekin...» — Iroq sobiq prezidentining advokati

^{Foto: AP Photo}
Iroqning sobiq prezidenti Saddam Husayn o‘zining sud jarayoni o‘lim jazosi bilan yakunlanishini bilar edi, lekin xavotir va qo‘rquvini namoyon qilmadi, dedi sobiq yetakchining advokati Muhammad Munib «RIA Novosti»ga bergan intervyusida.

Husayn 15 yil avval, AQSH Iroqqa bostirib kirganidan so‘ng, mamlakatda mavjudligi tasdiqlanmagan ommaviy qirg‘in qurollarini izlash bahonasida 30 dekabr kuni qatl etilgandi.

«U natija oldindan belgilangani, ular uning boshini istashini va hech qanday e’tiroz qabul qilinmasligini boshidanoq bilardi», — deydi Munib.

Shu bilan birga, advokatning so‘zlariga ko‘ra, Husayn Eronga o‘zining asosiy dushmani deb qarashda davom etgan.

«U mard edi, shu ma’nodaki, biz uning biror narsadan qo‘rqayotganini hech qachon sezmaganmiz: na ko‘rinishida, na so‘zida, na suhbatida, na bergan savollarida. U yuridik fakultet bitiruvchisi sifatida so‘zga chiqdi va sudning qonuniy emasligini bilgan holda bu soxta jarayonni fosh etish maqsadida ayrim huquqiy jihatlarga oydinlik kiritdi. Shu sababdan u hech kimga sir bo‘lmagan g‘urur va hurmatni uyg‘otdi. O‘ylaymanki, uning qatl etilish lahzasi — buni hammamiz televizorda ko‘rgandik — aytganlarimni tasdiqlaydi», — deya qo‘shimcha qildi Munib.

AQSH boshchiligidagi xalqaro koalitsiyaning Iroqqa bostirib kirishi 2003 yilda sodir bo‘lgan. Xalqaro terrorizmga qarshi kurash va ommaviy qirg‘in qurollarini izlash bahonasida prezident Saddam Husayn hokimiyatdan ag‘darilgan va qatl etilgan.

Iroqning sobiq rahbari qariyb olti oy davomida amerikaliklardan yashirinishga muvaffaq bo‘lgan, biroq 2003 yilning dekabrida u o‘zi tug‘ilgan shahar — Tikrit yaqinida qo‘lga olingan. Maxsus tribunalning birinchi yig‘ilishi 2004 yil iyul oyida bo‘lib o‘tdi. Sud Husaynni aybdor deb topdi va 2006 yilning 5 noyabrida osib o‘ldirishga hukm qildi. “Zamin” yangiliklarini “Youtube”da kuzatib boring