Afg‘oniston sobiq prezidenti Ashraf G‘ani Kobuldan qanday qochgani haqida gapirdi

^{Foto: Getty Images}
Afg‘onistonning sobiq prezidenti Ashraf G‘ani BBC’ga bergan intervyusida aytishicha, uning Kobuldan jo‘nab ketishi kutilmaganda ro‘y bergan, tayyorlanishga ikki daqiqadan ortiq vaqt yo‘q edi, shuningdek, yonida hech qanday pul solingan chamadon bo‘lmagan.

«Tolibon» 15 avgust kuni Kobulni egalladi. G‘anining so‘zlariga ko‘ra, o‘sha kuni ertalab u tez orada vatanini tark etishini xayoliga ham keltirmagandi. G‘ani uni Afg‘onistondan O‘zbekistonga, keyin BAAga olib ketgan samolyot bortida ketarkan endi amaldagi prezident emasligini tushungan.

Ashraf G‘anining so‘zlariga ko‘ra, u nafaqat o‘z hayotini, balki poytaxtni ham saqlab qolish uchun hal qiluvchi pallada Kobulni tark etgan.

Dastlab u rafiqasi va milliy xavfsizlik bo‘yicha maslahatchisini evakuatsiya qilishga rozi bo‘lgan. O‘zi esa Mudofaa vazirligiga olib boradigan mashinani kutib qolgan. Biroq davlat rahbari uchun mashina kelmagan. G‘anining aytishicha, prezident qo‘riqchilari boshlig‘i «dahshat ichida» uning oldiga kelgan va agar G‘ani qarshilik ko‘rsatishda davom etsa, «barchamiz halok bo‘lamiz», degan.

«U menga ikki daqiqadan ortiq vaqt bermadi. Bularning barchasi juda kutilmaganda ro‘y berdi», — deydi sobiq prezident.

U katta miqdordagi pulni mamlakatdan olib chiqib ketgani haqidagi ma’lumotni rad etdi va xalqaro tergov o‘tkazishga chaqirdi.

Ashraf G‘ani prezidentlik davrida xatolarga yo‘l qo‘yganini tan oldi. G‘anining so‘zlariga ko‘ra, uning hukumati qulashiga 2020 yilda «Tolibon» harakati va o‘sha paytdagi AQSH prezidenti Donald Tramp o‘rtasida Amerika qo‘shinlarini Afg‘onistondan olib chiqish bo‘yicha tuzilgan kelishuv sabab bo‘lgan. “Zamin” yangiliklarini “Instagram”da kuzatib boring