Jonson NATO Ukrainani qay tarzda qoʻllab-quvvatlashini ma'lum qildi

^{Foto: EPA-EFE/Leszek Szymanski}
NATOning hech bir a'zosi Rossiya bilan toʻqnashuv ehtimolini koʻrib chiqmayapti. Bu haqda Britaniya hukumati rahbari Boris Jonson NATO bosh kotibi Yens Stoltenberg va Estoniya bosh vaziri Kaya Kallas bilan birgalikda oʻtkazilgan matbuot anjumanida ma'lum qildi.

"NATOning har qanday a'zosi uchun Rossiya bilan harbiy toʻqnashuvda ishtirok etish hech bir a'zo davlat tomonidan koʻrib chiqilmayotgan ulkan qadam hisoblanadi. Bunday narsaga rozilik olish uchun parlament yoki mamlakat xalqining roziligini olishga toʻgʻri kelgan boʻlardi. Bu koʻrib chiqilmayapti, shu bilan birga Ukrainani gumanitar va logistik qoʻllab-quvvatlash, mudofaa qurollarini etkazib berish koʻrib chiqilmoqda", - dedi Jonson.

Uning ta'kidlashicha, Buyuk Britaniya Ukrainaga koʻngillilarni joʻnatishni qoʻllab-quvvatlayotgani yoki ragʻbatlantirayotgani toʻgʻrisida gapirish notoʻgʻri. "Birlashgan Qirollik bunday ish bilan shugʻullanmayapti", - dedi u.

Estoniyada Britaniya harbiylari sonining koʻpaytirilishi haqida gapirarkan, Jonson bu Londonning Moskva bilan ochiq toʻqnashuvga tayyorligini bildirmasligini ta'kidladi.

"Gap faqat mudofaa tusidagi choralar toʻgʻrisida bormoqda. Bu aniq-tiniq yangrashini istayman: biz Ukrainadagi Rossiya kuchlari bilan jang qilish niyatida emasmiz va bizning mamlakatlarimiz joʻnatayotgan kuchlar qat'iyan NATOga a'zo davlatlar chegarasida joylashtiriladi. Bu biz qilishimiz mumkin boʻlgan eng toʻgʻri ish", - dedi u.

Rossiyani BMT Xavfsizlik kengashidan chiqarish ehtimoli toʻgʻrisidagi savolga javob berarkan, Jonson buning uchun Rossiyaning oʻzining roziligi kerak boʻlishini aytdi. “Zamin” yangiliklarini “Telegram”da kuzatib boring