AQSh Xitoyni Rossiyaga yordam bermaslik haqida ogohlantirdi

^{Foto: «RIA Novosti»}
AQSh milliy xavfsizlik maslahatchisi Jeyk Sallivan 14 mart, dushanba kuni Rimda xitoylik diplomat Yan Szechi bilan etti soatlik uchrashuvda Xitoyning Rossiya bilan hamfikrligidan xavotir bildirdi. Vashington ham Pekin Moskvaning Ukrainadagi bosqiniga yordam bersa, yakkalanib qolishi va jazolanishi haqida ogohlantirdi.

Muzokaralar yakunlangach, Oq uy qisqa bayonot chiqarib, Sallivan «AQSh-Xitoy munosabatlaridagi qator masalalarni koʻtargani hamda Rossiyaning Ukrainaga qarshi urushini jiddiy muhokama qilganini» ta'kidladi.

«Agar ular (Xitoy) harbiy yoki boshqa turdagi yordam koʻrsatsa, sanktsiyalarni buzsa yoki urush harakatlarini qoʻllab-quvvatlasa, bu shubhasiz, jiddiy oqibatlarga olib keladi», — dedi Oq uy matbuot kotibi Jen Psaki.

AQShning Rossiya eksporti boʻyicha cheklovlariga qarshi chiqqan Xitoy kompaniyalari oʻz mahsulotlarini ishlab chiqarish uchun zarur boʻlgan Amerika uskunalari va dasturiy ta'minotidan mahrum qilinishi mumkin, degan edi oʻtgan hafta AQSh Savdo vaziri Jina Raymondo.

Avvalroq Financial Times, The New York Times va The Washington Post nashrlari AQSh hukumatidagi ismi oshkor etilmagan manbalarga tayanib, Rossiya hukumati Xitoydan Ukrainadagi bosqinini qoʻllab-quvvatlash uchun harbiy texnika va iqtisodiy yordam soʻragani haqida yozgandi.

Rossiya Xitoydan harbiy yordam soʻraganini inkor etdi va Ukrainadagi maqsadlarini amalga oshirish uchun etarli darajada harbiy kuchga ega ekanini iddao qildi.

Xitoy dunyodagi eng yirik eksportchi, Evropa Ittifoqining savdodagi eng yirik sherigi va AQShga asosiy xorijiy tovarlar etkazib beruvchi hisoblanadi. Xitoy savdosiga har qanday bosim AQSh va uning ittifoqchilariga iqtisodiy ta'sir koʻrsatishi mumkin. “Zamin” yangiliklarini “Telegram”da kuzatib boring