Bayden Ukrainani qurol, pul va oziq-ovqat bilan ta'minlashga va'da berdi

^{Foto: Getty Images}
AQSh prezidenti Jo Bayden Ukrainani qurol-yaroq, moliyaviy resurslar va oziq-ovqat bilan ta'minlashga va'da berdi. Bu haqda u Twitter’dagi sahifasiga yozib qoldirgan.

«Biz Ukrainani Rossiya bosqinidan himoyalanish uchun qurolga ega boʻlishini ta'minlaymiz. Ukrainaliklar hayotini saqlab qolish uchun pul, egulik va qoʻllab-quvvatlovni taqdim etamiz», — deydi Bayden.

«Biz ukrainalik qochqinlarni quchoq ochib kutib olamiz», — deya qoʻshimcha qiladi AQSh prezidenti.

Bayden AQSh ittifoqchilari bilan Ukrainaga xavfsizlik sohasida yordam koʻrsatishni davom etayotganini ma'lum qilgan. «Biz ukrain xalqiga oʻz millatini himoya qilishida yordam koʻrsatish uchun ittifoqchi va hamkorlarimiz bilan hamkorlikni davom ettiryapmiz. AQSh soʻnggi yilda Ukrainaga xavfsizlik sohasida 1,2 milliard dollardan ortiq mablagʻ ajratdi», — deb yozadi Bayden.

Avvalroq AQSh prezidentining milliy xavfsizlik boʻyicha maslahatchisi Jeyk Sallivan Vashington Moskvaning ogohlantirishiga qaramay, Ukrainaga qurol etkazib berishni toʻxtatmasligini ma'lum qilgandi.

Fevral oxirlarida AQSh prezidenti administratsiyasi Kongressdan Ukraina inqirozini tartibga solish bilan bogʻliq harakatlar uchun 6,4 milliard dollar ajratishni soʻragan edi. 2022 yilda AQSh Ukrainaga xavfsizlik sohasida yordam sifatida 650 million dollar va gumanitar yordam maqsadida 52 million dollar ajratgan. Mamlakat 2014 yildan buyon AQShdan umumiy qiymati 2,7 milliard dollarga teng yordam olgan.

Bundan oldin Evrokomissiya Ukrainaga 1,2 milliard evro ajratishni ma'qullagan, shuningdek yanvar boshida AQSh administratsiyasi Ukrainaga qoʻshimcha 200 million dollarlik harbiy yordam koʻrsatishni 2021 yil dekabrida ma'qullagani, 2022 yil 1 fevralda esa AQShdan yana 84 tonna harbiy yordam Ukrainaga etkazib berilgani xabar qilingan. Pentagon ma'lumotlariga koʻra, hozirda Ukrainaga 15 ta davlatdan qurollar etkazib berilmoqda. “Zamin” yangiliklarini “Telegram”da kuzatib boring