Ukrainadagi urushda boʻlib qaytgan rossiyalik jurnalist: Javobsiz savollar haqida

Elena Kostyuchenko Ukrainaga Rossiyaning «Novaya gazeta» muxbiri sifatida borgan edi. Uning Odessa, Xerson va Nikolaev shaharlarida tayyorlangan reportajlari ushbu gazetada tsenzura cheklovlari bilan e'lon qilingan. Rossiya Federatsiyasi qonunchiligiga rioya qilinganiga qaramay, Bosh prokuratura va «Roskomnadzor» talabi bilan matnlar oʻchirib tashlangan, «Novaya gazeta» esa oʻz ishini toʻxtatishga majbur boʻlgan.

«Novaya gazeta. Evropa» nashri uchun maxsus ravishda Elena Kostyuchenko Ukrainadagi urushda oʻzi koʻrgan narsalar haqida gapirib berdi.

— Oddiy fuqarolar mashinalarini nima sababdan oʻqqa tutishlarini bilmayman. Bolalar uyi tarbiyachilari oʻtirgan mashina haydovchisi aytdiki, ogohlantiruvchi oʻqlar otilgan boʻlishi mumkin, lekin hech kim buni tushunmagan, chunki odamlar ogohlantiruvchi oʻqlarni tanib oladigan darajada koʻp eshitmaydi.

Xersonning oʻzida men ham yonib ketgan mashinalarni koʻrganman. Jasadlar olib ketilgan, ammo yongan mashinalarning oʻzi qolgan. Bu qanday boʻlgan? Nima uchun? Bu vaqtda ularni nima boshqargan?

Xabarim bor, sudtibekspertiza byurosidan marhumlarni qabristonga tashiydigan mashina oʻqqa tutilgan. Bittagina mashina har kuni odamlarni dafn qilish uchun bitta yoʻnalishdan yuradi. Marhumlarning qarindoshlari hozir bormay qoʻygan, chunki blokpostlardan oʻtish qiyin va xavfli. Vidolashuv morgda boʻlib oʻtadi, shundan keyin jasad oʻraladi — agar pul boʻlsa, tobutga, pul boʻlmasa va tobut boʻlmasa, shunchaki qopga solinadi. Hozir asosan qora sanitariya qoplariga solinib, qabristonga olib ketilmoqda. Mana shu jasad va ikki goʻrkovni olib ketayotgan mashinaga oʻq uzilgan.

Yigitlar mashinadan yugurib tushgan, uning yoniga, erga yotib olgan, oʻq yomgʻiri toʻxtashini kutgan. Ular oʻqotar quroldan oʻqqa tutilgan, ya'ni mashinani nishonga olib oʻq uzishgan — bu shu yaqindagi qandaydir tasodifiy artilleriya zarbasi boʻlmagan. Keyinroq, oʻq yomgʻiri toʻxtaganidan keyin, ular mashinaga oʻtirib, qayrilgan va ortga qaytib ketgan.

Bir kun marhumlar koʻmilmasdan qolib ketgan, keyin yigitlarning oʻzlari: «Jasadlarni dafn qilish kerak-ku — boramiz». Va ular oʻsha yoʻnalish boʻyicha jasadlarni dafn qilish uchun yoʻl olgan va bu safar ular oʻqqa tutilmagan. Ya'ni bu qanday sodir boʻlgan, nima uchun, oʻzi umuman nima sababdan jasad tashuvchi mashinaga oʻq uzilgan, nimani koʻzlab bunday qilishadi, bularni tushuna olmayman.

Davomi bor... “Zamin” yangiliklarini “Telegram”da kuzatib boring