Ethereum Foundation tashkilotini yana ikki yuqori martabali tadqiqotchi tark etdi. Julian Ma va Carl Beek o‘z lavozimlarini tark etishlari bilan so‘nggi oylarda tashkilotni tark etgan nufuzli mutaxassislar soni kamida sakkiz nafarga yetdi. Julian Ma to‘rt yil, Carl Beek esa yetti yil davomida Ethereum ekotizimini rivojlantirishga o‘z hissasini qo‘shgan edi. Bu haqda Cointelegraph.com xabar beradi.
Julian Ma Ethereum tarmog‘ining senzura qarshiligi va turli qatlamlararo ko‘prik algoritmlari ustida ishlagan bo‘lsa, Carl Beek Beacon Chain loyihasining dastlabki dizayni hamda blokcheynda proof-of-stake mexanizmini joriy etishda muhim rol o‘ynagan. Ma o‘zining X ijtimoiy tarmog‘idagi sahifasida mahsulot va o‘sish strategiyasiga e’tibor qaratish uchun ketayotganini ma’lum qildi.
O‘tgan yili Ethereum asoschisi Vitalik Buterin tashkilotda boshqaruv o‘zgarishlari va yangi yo‘nalishlar belgilanganini e’lon qilgan edi. Bu qadam foydalanuvchilarning blokcheyn rivojlanish yo‘l xaritasi bo‘yicha tanqidlariga javob tariqasida amalga oshirilgan bo‘lib, maqsad tarmoq tezligini oshirish uchun yangi kadrlarni jalb qilishdan iborat. Biroq, joriy yilning may oyida besh nafar yetakchi dasturchi va tadqiqotchining ketishi tashkilotdagi kadrlar almashinuvi jarayoni davom etayotganini ko‘rsatmoqda.
Eslatib o‘tamiz, joriy oy boshida Protocol Cluster jamoasi yetakchilari Barnabé Monnot va Tim Beiko ham tashkilotni tark etishlarini e’lon qilishgan, Alex Stokes esa ta’tilga chiqqan edi. Aprel oyida loyiha menejeri Josh Stark va hissa qo‘shuvchi Trent Van Epps, fevral oyida esa ijrochi direktor o‘rinbosari Tomasz Stanczak o‘z lavozimlarini tark etganliklarini ma’lum qilgan edilar.
“Zamin”ni Telegramʻda oʻqing!
