Ethereum asoschilaridan biri Vitalik Buterin Ethereum Foundation (EF) tashkilotining ekotizimdagi roli borasidagi tanqidlarga munosabat bildirdi. U tashkilotni token narxini qoʻllab-quvvatlash va marketing bilan faolroq shugʻullanishga chaqirayotganlarga qarshi chiqib, fondning asosiy vazifasi neytrallikni saqlash ekanini taʼkidladi. Bu haqda Cointelegraph.com xabar beradi.
Buterinning soʻzlariga koʻra, Ethereum Foundation senzura barqarorligi, ochiq kodli dasturiy taʼminot, uzoq muddatli tadqiqotlar va kiberxavfsizlik kabi yoʻnalishlarga eʼtibor qaratishda davom etadi. U fond Ethereum protokolini markazlashmagan holda saqlashga intilishini va yuqori oʻtkazuvchanlikka ega boshqa blokcheynlar bilan raqobatlashishni maqsad qilmaganini aytdi.
Ushbu bayonotlar yirik ETH egalari oʻz aktivlarini sotayotgan va Ethereum Foundation tarkibida kadrlar almashinuvi kuzatilayotgan bir paytda yangradi. Hozirda Ethereum narxi 2,094 USD atrofida boʻlib, bu 2025-yil avgustidagi 5,000 USD lik rekord koʻrsatkichdan 50 foizga pastdir. Buterin EF barcha ETH zaxirasining atigi 0,16 foiziga egalik qilishini, boshqa fondlarda esa bu koʻrsatkich 10-50 foizni tashkil etishini eslatib oʻtdi.
Kriptovalyuta jurnalisti Laura Shin Ethereum tarmogʻidagi muammolarni 2024-yildagi Dencun yangilanishi bilan bogʻladi. Mazkur yangilanish layer-2 tranzaksiyalari uchun toʻlovlarni kamaytirgan boʻlsa-da, Ethereum asosiy tarmogʻining daromadlari keskin tushib ketishiga sabab boʻlgan edi. Buterin esa fond kelajakda tadqiqotlarni moliyalashtirish uchun mablagʻlarni tejashini va kamroq ETH sotishini maʼlum qildi.
“Zamin”ni Telegramʻda oʻqing!
