Dushanba kuni Bitcoin (BTC) narxi 76 500 dollargacha pasayib, oy boshidan beri erishilgan barcha o‘sishlarni yo‘qqa chiqardi. Yaqin Sharqdagi geosiyosiy taranglik kripto bozoridagi kayfiyatga salbiy ta’sir ko‘rsatib, investorlarni xatarlarni qayta baholashga va ehtiyotkorlik bilan harakat qilishga majbur qildi. Bu haqda Cointelegraph.com xabar beradi.
CryptoQuant tahliliy ma’lumotlariga ko‘ra, 155 kundan kamroq vaqt davomida aktivga egalik qilgan qisqa muddatli investorlar dushanba kuni Binance birjasiga 10 000 dan ortiq BTC o‘tkazishgan. Ushbu operatsiyalar o‘rtacha sotib olish narxi 78 440 dollar bo‘lgan sharoitda, taxminan 76 900 dollar atrofida amalga oshirilgan. Natijada, investorlar qariyb 769 million dollarlik Bitcoin’ni zararga sotishga majbur bo‘lishdi.
Tahlilchilar ushbu holatni bozor tuzatish davrida zaif qo‘llarning vahima ichida aktivlarini sotishi yoki kapitulyatsiya sifatida baholamoqda. Glassnode ma’lumotlariga ko‘ra, hozirda 7,8 milliondan ortiq BTC zararda saqlanmoqda va bozor barqaror o‘sishga qaytishi uchun ushbu ortiqcha taklifni o‘zlashtirib olishi kerak.
Vaziyatni yanada murakkablashtirayotgan omillardan biri — AQShdagi spot Bitcoin ETF’laridan mablag‘larning chiqib ketishi. So‘nggi sakkiz kun ichida ushbu fondlar olti marta salbiy ko‘rsatkich qayd etdi, bu esa institutsional investorlar orasida ham xavotir kuchayganidan dalolat beradi.
“Zamin”ni Telegramʻda oʻqing!
