Bitcoin spot ETFʻlardan 2 milliard dollar chiqib ketishiga qaramay 77 000 dollardan oshdi
Chorshanba kuni Brent neft narxi 108 dollardan pastga tushishi ortidan xatarli aktivlar bozorida biroz yengillik kuzatildi va Bitcoin (BTC) narxi 77 000 dollar darajasini qayta zabt etdi. Biroq, spot Bitcoin ETFʻlaridan kuzatilgan yirik mablagʻ chiqib ketishi treyderlarni global iqtisodiy pasayish qoʻrquvi fonida narxlarning yanada tushish ehtimolini qayta koʻrib chiqishga majbur qildi. Bu haqda Cointelegraph.com xabar beradi.
Bitcoin narxining harakati AQSHning kichik kapitallashuvga ega kompaniyalari indeksi — Russell 2000 bilan hamohanglikni koʻrsatmoqda. Bu esa hozirgi vaqtda kriptovalyuta bozorini asosan makroiqtisodiy omillar boshqarayotganidan dalolat beradi. AQSHda roʻyxatga olingan spot Bitcoin ETFʻlaridan soʻnggi yetti kun ichida jami 2 milliard dollar mablagʻ olib chiqilgani narxning 75 000 dollardan pastga tushishi borasidagi xavotirlarni kuchaytirdi.
Hozirda investorlar eʻtibori sunʻiy intellekt sektoriga qaratilgan boʻlib, bozorlar NVIDIA kompaniyasining choraklik hisobotini kutmoqda. Yahoo Finance maʻlumotlariga koʻra, investorlar AMD, Amazon va Google kabi raqobatchilarning bosimidan xavfsiramoqda. Shu bilan birga, Xitoydagi stablecoin oqimlari investorlarning kripto aktivlarga boʻlgan ishtiyoqi pastligini koʻrsatmoqda.
Xitoyda stablecoinʻlar rasmiy valyuta kursiga nisbatan 0,4 foizlik chegirma bilan sotilmoqda, bu esa kripto bozoridan chiqishga boʻlgan talab yuqoriligini anglatadi. Odatda, Xitoydagi qatʻiy kapital nazorati tufayli ushbu koʻrsatkich 0,3 foizdan 0,8 foizgacha premium (ustama) bilan savdo qilinishi kerak edi.
Bozordagi umumiy xavfsirash neft narxining barqarorligi va AQSH gʻaznachilik obligatsiyalari daromadligining oshishi bilan ham bogʻliq. Energiya resurslari narxining yuqoriligi inflyatsiya bosimini ushlab turibdi, bu esa Fed tizimining iqtisodiy retsessiyaga qarshi kengaytiruvchi pul-kredit choralarini qoʻllash imkoniyatini cheklamoqda.
“Zamin”ni Telegramʻda oʻqing!
