O‘zbekiston va Turkiya o‘rtasidagi iqtisodiy hamkorlik izchil ravishda kengayib bormoqda. Milliy statistika qo‘mitasi ma’lumotlariga ko‘ra, 2026 yilning yanvar–mart oylarida ikki davlat o‘rtasidagi tashqi savdo aylanmasi 653,4 million AQSH dollarini tashkil etdi.
Bu ko‘rsatkich 2025 yilning mos davri bilan solishtirilganda 42,7 million dollarga yoki 7 foizga oshgan. Demak, O‘zbekiston va Turkiya o‘rtasidagi savdo aloqalari barqaror o‘sish sur’atini saqlab qolmoqda.
Joriy yilning birinchi choragida O‘zbekistonning Turkiyaga eksporti 231,6 million dollarni tashkil etgan bo‘lsa, import hajmi 421,8 million dollarga yetdi. Umumiy tashqi savdo aylanmasi esa 653,4 million dollar bo‘ldi.
O‘zbekistonda Turkiya kapitali ishtirokida faoliyat yuritayotgan korxonalar soni ham yuqoriligicha qolmoqda. 2026 yil 1 aprel holatiga ko‘ra, mamlakatimizda Turkiya sarmoyasi ishtirokida 2 186 ta korxona faoliyat yuritmoqda.
Shuningdek, Turkiyadan asosiy kapitalga o‘zlashtirilgan xorijiy investitsiya va kreditlar hajmi 655,2 million AQSH dollarini tashkil etgan. Bu ko‘rsatkich ikki davlat o‘rtasida nafaqat savdo, balki investitsiyaviy hamkorlik ham faol rivojlanayotganini ko‘rsatadi.
Turistik aloqalarda ham sezilarli harakat bor. 2026 yilning yanvar–mart oylarida Turkiyadan O‘zbekistonga 39 445 nafar turist kelgan. Shu davrda O‘zbekistondan Turkiyaga 52 199 nafar fuqaro turistik maqsadda safar qilgan.
Ta’lim sohasidagi almashinuvlar ham davom etmoqda. Turkiyadan O‘zbekistonga o‘qish maqsadida 423 nafar fuqaro kelgan bo‘lsa, O‘zbekistondan Turkiyaga ta’lim olish uchun 527 nafar kishi yo‘l olgan.
Qisqasi, O‘zbekiston va Turkiya o‘rtasidagi hamkorlik savdo, investitsiya, turizm va ta’lim yo‘nalishlarida faol o‘sib bormoqda. Raqamlar bitta narsani ko‘rsatyapti: ikki davlat o‘rtasidagi aloqalar shunchaki diplomatik gap emas, real iqtisodiy harakatga aylanyapti.
“Zamin”ni Telegramʻda oʻqing!
