Nyu-Yorkdagi sud jarayoni Satoshi Nakamoto hamyonlariga egalik qilishni koʻrib chiqmoqda
Nyu-Yorkda Noah Doe hamda Vayomingda roʻyxatdan oʻtgan ABC Company va XYZ Company tomonidan kiritilgan daʼvo arizasi kriptovalyuta olamida katta shov-shuvga sabab boʻldi. Daʼvogarlar 39 069 ta harakatsiz Bitcoin manzillariga, jumladan, tarmoq asoschisi Satoshi Nakamoto va ilk maynerlarga tegishli hamyonlarga egalik huquqini talab qilmoqda. Ularning taʼkidlashicha, ushbu aktivlar Nyu-York qonunchiligiga koʻra "tashlab ketilgan mulk" hisoblanadi. Bu haqda Cointelegraph.com xabar beradi.
Daʼvo arizasida koʻrsatilgan manzillarda jami 3,7 million BTC mavjud boʻlib, ularning umumiy qiymati qariyb 285 milliard USDga teng. Daʼvogarlar ushbu hamyonlarni topilgan mulk sifatida Nyu-York politsiya departamentiga xabar berganliklarini va endilikda ularni anʼanaviy bank hisobvaraqlari kabi musodara qilinishi mumkin boʻlgan aktiv deb hisoblashlarini aytishmoqda. Biroq, huquqiy ekspertlar ushbu daʼvoning asosliligi borasida shubha bildirmoqdalar.
Castle Labs tadqiqot tahlilchisi Noveleaderning soʻzlariga koʻra, sud daʼvogarlar foydasiga qaror chiqargan taqdirda ham, bu shunchaki ramziy maʼnoga ega boʻladi. Bitcoin tarmogʻida shaxsiy kalitlarsiz (private keys) mablagʻlarni qayta taqsimlash mexanizmi mavjud emas. Texnik jihatdan, blokcheyn tarmogʻini sud qarori bilan oʻzgartirib boʻlmaydi, bu esa daʼvoning ijrosini imkonsiz qiladi.
Shuningdek, tahlilchilar ushbu tangalarning aksariyati vafot etgan shaxslarga, kalitlarini yoʻqotganlarga yoki shunchaki uzoq muddatli investorlarga tegishli ekanini taʼkidlamoqda. Timechain Index asoschisi Sanining qayd etishicha, daʼvogarlar huquqiy bildirishnomalarni notoʻgʻri formatdagi manzillarga yuborgan boʻlishi mumkin, bu esa mulkdorlarni qonuniy ravishda ogohlantirish jarayonini yanada shubhali qilib qoʻyadi.
“Zamin”ni Telegramʻda oʻqing!
