Bitcoin (BTC) bozorida moliyalashtirish stavkalarining koʻtarilishi va ochiq qiziqishning (open interest) ortishi buqalarning 70 000 dollarlik muhim qoʻllab-quvvatlash darajasini saqlab qolishga urinayotganidan dalolat beradi. Biroq, spot ETF’lardan mablagʻlarning chiqib ketishi institutsional investorlarning Bitcoin’ga nisbatan yondashuvi oʻzgarayotgani haqidagi xavotirlarni keltirib chiqarmoqda. Bu haqda Cointelegraph.com xabar beradi.
Hyblock maʼlumotlariga koʻra, chakana investorlar narxlarning pasayishini qulay xarid imkoniyati sifatida baholamoqda. Ochiq qiziqishning barqarorligi shuni koʻrsatadiki, treyderlar oʻz pozitsiyalarini saqlab qolish uchun qoʻshimcha mablagʻ kiritmoqda yoki yangi long pozitsiyalarini ochmoqda. Birjalararo moliyalashtirish stavkalari ham asosan ijobiy boʻlib, bu bozorda oʻsishga boʻlgan ishonch hali ham kuchli ekanini anglatadi.
Bitfinex tahlilchilari investorlar AQSHning Shaxsiy isteʼmol xarajatlari (PCE) hisoboti oldidan ehtiyotkorlik choralarini koʻrayotganini taʼkidlamoqda. Chorshanba kuni spot Bitcoin ETF’laridan 200 million dollardan ortiq mablagʻ chiqib ketdi, soʻnggi 7 kun ichida esa bu koʻrsatkich 1,5 milliard dollardan oshdi. Bu holat bozor dinamikasiga sezilarli bosim oʻtkazmoqda.
Coinbase birjasidagi premium koʻrsatkichining manfiy hududga oʻtishi ham muhim ogohlantirish signali sifatida koʻrilmoqda. Tahlilchilarning fikricha, ETF’lar paydo boʻlgandan soʻng, Coinbase’dagi toʻgʻridan-toʻgʻri talab oʻrnini ETF va birjadan tashqari (OTC) savdo maydonchalari orqali amalga oshiriladigan institutsional talab egalladi.
Hozirgi vaqtda Bitcoin narxi pastroq taymfreymlarda oʻsish tendensiyasini saqlab qolayotgan boʻlsa-da, tahlilchilar trendning davom etishi uchun zarur boʻlgan texnik shartlar hali toʻliq shakllanmaganini aytishmoqda. 70 000 dollarlik daraja yaqin kunlardagi asosiy kurash maydoni boʻlib qoladi.
“Zamin”ni Telegramʻda oʻqing!
