Kriptovalyuta bozorida institutsional investorlarning ishtiroki ortib borayotganiga qaramay, chakana investorlarning kayfiyati Wall Street chetda turgan paytdagidek muhimligicha qolmoqda. Bu haqda Swan Bitcoin bosh direktori Cory Klippsten Cointelegraph nashriga bergan intervyusida maʻlum qildi. Bu haqda Cointelegraph.com xabar beradi.
Klippstenning taʻkidlashicha, BlackRock yoki Fidelity kabi gigantlar Bitcoin aktivlariga egalik qilsa-da, aslida bu mablagʻlar ortida koʻplab chakana hisob raqamlari turibdi. Uning soʻzlariga koʻra, AQSHdagi spot Bitcoin ETF fondlari orqali amalga oshirilayotgan xaridlar ham real talabni shakllantiradi va umumiy taklif hajmini kamaytiradi.
Farside maʻlumotlariga koʻra, 15-maydan buyon AQSHdagi spot Bitcoin ETFlaridan jami 2,90 milliard dollar miqdorida mablagʻ chiqib ketgan. Shu davr mobaynida Bitcoin narxi taxminan 9,5 foizga pasaydi. Hozirgi vaqtda Bitcoin 73,630 dollar atrofida savdo qilinmoqda va soʻnggi 30 kun ichida 2,87 foizga arzonlashgan.
Bozordagi umumiy kayfiyatni oʻlchovchi Crypto Fear & Greed Index koʻrsatkichi juma kuni 23 ballni tashkil etib, "Ekstremal qoʻrquv" holatini qayd etdi. Bu investorlarning kripto bozoriga nisbatan ehtiyotkorona yondashayotganidan dalolat beradi.
Klippsten 2026-yilda Bitcoin yangi rekord darajaga (ATH) chiqish imkoniyatlarini past baholamoqda. Avvalroq u bu ehtimolni 50 foiz deb hisoblagan boʻlsa, narxlarning pasayishi fonida hozirda ushbu koʻrsatkichni 20-25 foiz atrofida deb biladi.
“Zamin”ni Telegramʻda oʻqing!
