Nomaʼlum shaxs yoki tashkilot qiymati taxminan 8,5 million dollarga teng boʻlgan 107 Bitcoin aktivini maxsus manzilga yuborish orqali muomaladan chiqardi. Ushbu mablagʻlar 12 yildan ortiq vaqt davomida harakatsiz yotganidan soʻng amalga oshirilgan tranzaksiya kripto hamjamiyatida turli nazariyalarni keltirib chiqardi. Bu haqda Cointelegraph.com xabar beradi.
Galaxy Research maʼlumotlariga koʻra, dushanba kuni beshta Bitcoin hamyonidan jami 107 BTC "11111" bilan boshlanadigan eski "yondirish" (burn) manziliga oʻtkazilgan. Ushbu manzilning shaxsiy kalitlari mavjud emasligi sababli, unga tushgan mablagʻlarni qayta sarflashning imkoni yoʻq. Arkham platformasi maʼlumotlariga koʻra, mazkur operatsiyadan soʻng ushbu manzildagi jami Bitcoin miqdori 807 taga (taxminan 59 million dollar) yetdi.
Ushbu voqea 2026-yilning eng yirik Bitcoin yondirishlaridan biri sifatida qayd etildi. Eʼtiborlisi, ushbu tangalar 12 yil avval, Bitcoin narxi 600 dollardan past boʻlgan vaqtda sotib olingan edi. Oʻshandan beri aktivning qiymati 12,700 foizga oʻsgan. Bitcoin tarmogʻida Ethereum yoki BNB kabi avtomatik yondirish mexanizmi yoʻqligi sababli, tangalarni yoʻq qilish faqat ularni qaytarib boʻlmaydigan manzillarga yuborish orqali amalga oshiriladi.
Tahlilchilar ushbu gʻalati harakatning sabablari boʻyicha turli taxminlarni ilgari surmoqda. Galaxy Research buni soliq majburiyatlarini kamaytirish yoki noqonuniy faoliyat izlarini oʻchirish harakati boʻlishi mumkinligini taxmin qildi. Shuningdek, sunʼiy intellekt (AI) agenti tomonidan yoʻl qoʻyilgan texnik xatolik ehtimoli ham koʻrib chiqilmoqda.
Bloomberg tahlilchisi Eric Balchunas ham "isyonchi AI" yoki oʻgʻirlab ketish bilan bogʻliq holatlarni istisno qilmadi. Coinbase birjasi vakili Conor Grogan esa, bu holat katta ehtimol bilan birjalardan birining sovuq hamyonlar (cold storage) oʻrtasidagi oʻtkazmalarda yoʻl qoʻygan xatosi ekanligini taʼkidladi.
“Zamin”ni Telegramʻda oʻqing!
