09:23 / 12.05.2022

Surxondaryoda xizmat iti vagon g‘ildiragiga yashirilgan 1,7 kilogramm giyohvand moddalarni topdi

^{Foto: Surxondaryo viloyati Bojxona boshqarmasi}
Surxondaryo viloyatidagi «Ayritom» bojxona postida mamlakatga kirib kelgan vagonlardan gashish va opiy giyohvand moddalari topildi. Bu haqda viloyat Bojxona boshqarmasi axborot xizmati xabar qildi.

Qayd etilishicha, viloyati bojxona boshqarmasi «Ayritom» chegara bojxona posti va Kontrabandaga qarshi kurashish va bojxona auditi bo‘limi xodimlari Davlat xavfsizlik xizmati chegara qo‘shinlari harbiy xizmatchilari bilan hamkorlikda bojxona xizmati kichik inspektor-kinologiga biriktirilgan xizmat iti yordamida tezkor tadbir o‘tkazgan.

Unda bojxona postiga qo‘shni mamlakatdan kirib kelgan temir yo‘l yuk vagonlari sinchkovlik bilan bojxona nazoratidan o‘tkazilgan. Natijada hujjatlarga ko‘ra bo‘sh deya ko‘rsatilgan yuk vagonlaridan birining oldi g‘ildiraklari orasiga yashirilgan 2 ta selofan o‘ramdagi 1 kilogramm 50 gramm gashish va 705 gramm og‘irlikdagi opiy giyohvandlik vositasi borligi aniqlangan. Giyohvandlik vositalarining umumiy og‘irligi 1 kilogramm 55 grammni tashkil qilgan.

^{Foto: Surxondaryo viloyati Bojxona boshqarmasi}

^{Foto: Surxondaryo viloyati Bojxona boshqarmasi}
Holat yuzasidan bojxona organlari tomonidan jinoyat ishi qo‘zg‘atilgan.

Ma’lumot uchun, Surxondaryo viloyati bojxona boshqarmasi tomonidan joriy yilning birinchi choragi davomida bojxona postlari orqali kirib kelayotgan va ichki hududlarda noqonuniy muomalada bo‘lgan jami 141 kilogramm 470 gramm giyohvandlik vositalari va 610 dona giyohvandlik hamda psixotrop tabletkalari bojxona xodimlari tomonidan boshqa huquq-tartibot idora vakillari bilan hamkorlikda to‘xtatib qolingan.