Ayni vaqtda prezident Shavkat Mirziyoyev ishtirokida Termiz shahrida xalq deputatlari Surxondaryo viloyati kengashi sessiyasi boʻlib oʻtayotgani toʻgʻrisida xabar berilgandi. Davlat rahbari yigʻilishda “Oʻzbekiston kim tomonda?” degan savolga javob berdi.
“Zamon juda murakkab, hozir katta-katta davlatlar Oʻzbekiston, sen kim tomondasan, deyapti. Neytral boʻlib yurishing boʻldi endi, yo u tomonga, yoki bu tomonga oʻtgin. Qattiq-qattiq aytib, vakillari ham kelib, oʻzlari ham shunga da'vat qilyapti. Bizga kerak Oʻrta Osiyoda Oʻzbekiston. Aholisi 36 million boʻldi, 3-4 yilda 40 million boʻladi, katta davlat boʻladi, kim tomonsan, deyapti. Qani, bunday ogʻir savolga qanday javob berish kerak?! Javobim bitta — bir tomonman. Millatim, xalqim buyuk Oʻzbekistonimning manfaati uchun oʻlishga ham tayyorman, deb javob beraman”, — deydi davlat rahbari.
Avvalroq Shavkat Mirziyoyev Surxondaryoga tashrifini Hakim at-Termiziy maqbarasini ziyorat qilishdan boshlagani toʻgʻrisida xabar berilgandi. Shuningdek, bugungi sessiyada Surxondaryo viloyatiga hokim tayinlash boʻyicha tashkiliy masala koʻrib chiqilmoqda. Prezident viloyat deputatlari va faollari bilan maslahatlashib, viloyat hokimi vazifasini bajarib kelayotgan Ulugʻbek Qosimov nomzodini bu lavozimga taklif qildi.
“Zamin” yangiliklarini “Telegram”da kuzatib boring
