Putin Ikkinchi jahon urushi nogironlari va faxriylariga 7 ming rubldan to‘lash haqida ko‘rsatma berdi

Rossiya prezidenti Ikkinchi jahon urushi (Rossiyada – “Ulug‘ Vatan urushi”) nogironlari va faxriylariga bir martalik rag‘batlantiruvchi to‘lovlarni berish haqida farmonni imzoladi. To‘lov miqdori – 7 ming rubl, deya xabar bermoqda Meduza.io.

Shuningdek, konslagerlarning voyaga etmagan sobiq mahbuslari hamda Ikkinchi jahon urushi va Finlandiya hamda Yaponiyaga qarshi urushlarda halok bo‘lganlarning bevalariga ham shuncha miqdorda pul to‘lanadi.

Konslagerlarning voyaga etgan sobiq mahbuslari, Ikkinchi jahon urushi vaqtida front ortida kamida bir yarim yil mehnat qilgan shaxslarga 3 ming rubldan pul to‘lanadi.

Rossiya prezidentining ushbu farmoni Rossiya aholisi, shuningdek, Boltiqbo‘yidagi uch davlat – Latviya, Litva va Estoniya fuqarolariga tatbiq etiladi. Ushbu to‘lovlar Ikkinchi jahon urushidagi g‘alabaning 70 yilligi munosabati bilan to‘lanadi.

Manba: www.kun.uz “Zamin” yangiliklarini “Twitter”da kuzatib boring