Rossiyaning Qozon shahrida 70 ta davlatdan borgan 7 mingdan ortiq delegatlar ishtirokida Yevroosiyo ortopediya forumi bo‘lib o‘tdi. Bu haqda Sog‘liqni saqlash vazirligi matbuot xizmati xabar berdi.
Tadbir onlayn va offlayn formatda tashkil etildi. Unda O‘zbekistondan Respublika ixtisoslashtirilgan travmatologiya va ortopediya ilmiy-amaliy tibbiyot markazining 9 nafar hamda mamlakatdagi boshqa tibbiyot va ta’lim muassasalarining 6 nafar mutaxassisi qatnashdi.
Travmatologiya va ortopediya sohasiga doir dolzarb masalalar muhokama qilingan anjuman doirasidagi 15 ta seksiya yig‘ilishlarida markaz mutaxassislari 20 ta ma’ruza bilan chiqish qildi.
Ta’kidlanishicha, tizza va son-chanoq bo‘g‘imi patologiyalari, umurtqa va yelka bo‘g‘imlari kasalliklarini zamonaviy usullarda muolaja qilish, bolalarda tug‘ma anomaliyalarni tashxislash hamda davolash bilan bog‘liq O‘zbekiston tajribasi qatnashchilarda katta qiziqish uyg‘otdi.
Shuningdek, Respublika ixtisoslashtirilgan travmatologiya va ortopediya ilmiy-amaliy tibbiyot markazi vakillari 9 ta yo‘nalish bo‘yicha mahorat darslarida qatnashib, eng ilg‘or tibbiy texnika hamda operatsiya usullari bilan yaqindan tanishdi.
“Zamin” yangiliklarini “Youtube”da kuzatib boring
