Yakshanba kuni Oʻzbekiston hududining katta qismida ob-havoning keskin oʻzgarishi kutilmoqda, deb xabar berdi “Oʻzgidromet”.
Ma'lum qilinishicha, 26 avgust, shanba kuni respublikaning shimoli-gʻarbiy hududlariga Rossiyaning janubiy hududlaridan nam va salqin havo massalari kirib kelishi boshlanadi. Qoraqalpogʻiston Respublikasi, Xorazm viloyatida va kunning ikkinchi yarmida Buxoro, Navoiy viloyatlarida ba'zi joylarda qisqa muddatli yomgʻir yogʻishi, momaqaldiroq boʻlishi mumkin.
Respublikaning qolgan hududlarida 26 avgustda quruq ob-havo saqlanib turadi, harorat 33-36 daraja boʻladi.
27—28 avgust kunlari nam va salqin havo massalari kirib kelishi Oʻzbekistonning barcha hududlarini qamrab oladi. Barcha joylarda bulutlilik kuchayishi kutilmoqda, respublikaning koʻpchilik viloyatlarida vaqti-vaqti bilan momaqaldiroq bilan yomgʻir yogʻadi. Kunduzgi havo harorati 23-28 darajagacha pasayadi. Kechasi va ertalab havo bir oz salqinlashadi. 28 avgustga kelib, kechasi harorat 13-16 darajagacha pasayadi.
Ushbu kunlarda shamol tezligi 17-22 metr/sekundgacha kuchayishi kutilmoqda, ba'zi joylarda 23-25 metr/sekundgacha kuchayishi, ayrim joylarda chang-toʻzon bilan kuzatilishi mumkin.
Respublikaning togʻoldi va togʻli hududlarida ob-havo oʻzgarishi sezilarli boʻladi, bu hududlarda 27—28 avgust kunlari ba'zi joylarda kuchli yomgʻirlar yogʻib oʻtadi. Kutilayotgan kuchli yomgʻirlar yogʻishi hisobiga respublikaning togʻoldi va togʻli hududlarida 27—29 avgust kunlari sel-suv toshqini yuzaga kelishi mumkin.
