Daraxtga elektromobil quvvatlagichini o‘rnatgan fuqaro 1,7 mln so‘m jarimaga tortildi

^{Foto: Toshkent shahar ekologiya boshqarmasi}
Toshkent shahrida daraxtga elektromobil quvvatlagichi o‘rnatgan fuqaroga chora ko‘rildi. Bu haqda poytaxt ekologiya boshqarmasi xabar berdi.

Ijtimoiy tarmoqlarda Chilonzor tumani 16-mavze 5-uy oldida 1 tup daraxtga elektromobil quvvatlagichi burama mix bilan o‘rnatilgani haqida xabar tarqaldi. Mazkur holat yuzasidan Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi Chilonzor tumani inspektorlari tomonidan o‘rganish ishlari olib borilgan.

Natijada fuqaro A.X. tomonidan tumanning 16-mavze 5-uy oldidagi 1 tup daraxtga elektromobil quvvatlagichi burama mix bilan o‘rnatilgani aniqlangan va vaziyat joyida bartaraf etilgan.

Yuqoridagi holat bo‘yicha fuqaro A.X.ga Ma’muriy javobgarlik to‘g‘risidagi kodeksning 79-moddasi 1-qismi (o‘simlik dunyosi obyektlarini yig‘ish, tayyorlash va ulardan foydalanish tartibi hamda shartlarini buzish) bo‘yicha ma’muriy bayonnoma rasmiylashtirilib, 1,7 million so‘m jarima belgilangan hamda tushuntirish ishlari olib borilgan. “Zamin” yangiliklarini “Telegram”da kuzatib boring