Janubiy Koreya prezidenti rafiqasi bilan birga O‘zbekistonga keldi

^{Foto: Telegram / Bekzod Hidoyatov}
Janubiy Koreya prezidenti Yun Sok Yol 13 iyun kuni rafiqasi bilan birga O‘zbekistonga keldi. Ularni Toshkent xalqaro aeroportida bosh vazir Abdulla Aripov va boshqa rasmiylar kutib oldi.

Bosh vazir matbuot kotibi Bekzod Hidoyatovning ma’lum qilishicha, qisqa suhbatdan so‘ng Janubiy Koreya prezidenti turmush o‘rtog‘i hamrohligida o‘zlari uchun ajratilgan qarorgohga jo‘nab ketdi.

^{Foto: Telegram / Bekzod Hidoyatov}
Shavkat Mirziyoyevning taklifiga binoan kelgan Yun Sok Yol O‘zbekistonda 13—15 iyun kunlari bo‘ladi. Tashrif dasturiga muvofiq, Toshkent shahrida bo‘lib o‘tadigan oliy darajadagi muzokaralarda O‘zbekiston—Koreya do‘stlik va alohida strategik sheriklik munosabatlarini yanada rivojlantirishning dolzarb masalalari ko‘rib chiqiladi.

Savdo, innovatsiyalar va texnologiyalar almashinuvi, energetika, elektronika va elektrotexnika, kimyo sanoati, qishloq xo‘jaligi, infratuzilmaviy rivojlanish va boshqa ustuvor yo‘nalishlarda amaliy hamkorlikni kengaytirish masalalari e’tibor markazida bo‘ladi. Ta’lim, sog‘liqni saqlash, madaniyat, sport va turizm sohalaridagi qo‘shma dasturlar muhokama qilinadi.

Shuningdek, mintaqaviy, shu jumladan, “Markaziy Osiyo—Koreya Respublikasi” formatidagi hamkorlik yuzasidan ham fikr almashish rejalashtirilgan.

^{Foto: Telegram / Bekzod Hidoyatov}
Sammit yakunlari bo‘yicha bir qator hukumatlararo va idoralararo hujjatlar imzolanishi ko‘zda tutilgan.

Tashrifning ishbilarmonlik dasturi doirasida O‘zbekiston va Janubiy Koreya prezidentlari qo‘shma biznes forumida ishtirok etadi. Prezident Yun Sok Yol O‘zbekistonning boy madaniy-tarixiy merosi bilan tanishish maqsadida Samarqand shahriga tashrif buyuradi. “Zamin” yangiliklarini “Odnoklassniki”da kuzatib boring