Jizzaxda odamlarning nomiga kredit olib, o‘z ehtiyojiga ishlatib yuborgan bankir 7 yilga qamaldi

Ombudsmanning Jizzax viloyatidagi mintaqaviy vakiliga bir guruh fuqarolar oylik ish haqlari plastik kartochkaga kelib tushganda bank asossiz ravishda “kreditdan bo‘lgan qarzdorligi uchun” deb pullarini yechib olib qo‘yganidan norozi bo‘lib shikoyat qilishgan. Bu haqda Ombudsman matbuot xizmati xabar berdi.

Ma’lum qilinishicha, murojaatchilar “Agrobank” ATB Arnasoy filiali bilan kredit shartnomasi rasmiylashtirgan. Lekin mazkur bank filiali boshqaruvchisi o‘rinbosari S.A. ularga qo‘ng‘iroq qilib, oylik maoshlari kamligi sababli kredit mablag‘lari berilmaydigan bo‘lganini og‘zaki xabar qilgan.

U o‘z mansab mavqeyidan foydalanib, bir qator fuqarolar nomiga kredit rasmiylashtirgan. Jumladan, murojaatchi A.I. nomiga jami 18,5 mln so‘m yillik 26,99 foiz ustama haq to‘lash sharti bilan 4 yil muddatga kredit olgan. Fuqaro o‘zining nomiga chiqarilgan bank kredit kartasini olishni rad etgan bo‘lsa-da, ularning xabarisiz ushbu karta mablag‘larini o‘z nomiga ochilgan bank plastik kartalariga o‘tkazishga erishib, kredit mablag‘larini o‘z manfaatlari yo‘lida o‘zlashtirgan.

“Jinoyat ishlari bo‘yicha Paxtakor tuman sudining 2023 yil 11 apreldagi hukmiga ko‘ra, S.A. Jinoyat kodeksining bir qancha moddalari bilan aybdor deb topilib, bank sohasida hamda boshqa tashkilotlarda mansabdorlik va moddiy javobgarlik lavozimlarida ishlash huquqidan mahrum etilgan hamda unga 7 yilga ozodlikdan mahrum etish jazosi tayinlangan. Shuningdek, S.A.dan jami 145 mln so‘m miqdoridagi moddiy zarar “Agrobank” ATB Arnasoy filiali foydasiga undirish belgilangan.

Shunday bo‘lsa-da, mazkur bank filiali tomonidan kreditni qoplash uchun murojaatchilar nomiga sms xabar ko‘rinishida talabnomalar kelib, plastik kartalariga kelib tushgan oylik ish haqidan kreditlarni qoplash uchun pul undirilishi davom etgan”, deyiladi Ombudsman xabarida.

Qayd etilishicha, hujjatlar o‘rganilib, Ombudsman tomonidan sudga mehnat qonunchiligining buzilgani holati bo‘yicha fuqarolar manfaatida da’vo ariza kiritilgan. Natijada fuqarolik ishlari bo‘yicha Do‘stlik tumanlararo sudining hal qiluv qarori bilan fuqarolar va bank o‘rtasida tuzilgan kredit shartnomalari bekor qilinib, murojaatchilarning buzilgan huquqlari tiklangan. “Zamin” yangiliklarini “Youtube”da kuzatib boring