O‘zbekistonda bir oyda 234,7 mlrd so‘mlik energiya resurslari o‘g‘irlangani aniqlandi

^{Foto: “O‘zenergoinspeksiya” matbuot xizmati}
O‘zbekistonda so‘nggi bir oyda energiya resurslaridan noqonuniy foydalanishlar natijasida davlat manfaatlariga 234 milliard 778 million so‘mlik zarar yetkazildi. Bu haqda “O‘zenergoinspeksiya” matbuot xizmati xabar berdi.

Qayd etilishicha, iyul oyida “O‘zenergoinspeksiya” va huquqni muhofaza qiluvchi organlar bilan hamkorlikda o‘tkazilgan nazorat tadbirlarida 801 ta holatda iste’molchilarning energiya resurslaridan noqonuniy foydalangani aniqlangan.

Bunda 115,2 milliard so‘mlik elektr energiyasi (169 million 492 ming kilovatt/soat) va 119,5 milliard so‘mlik tabiiy gaz (53 million 552 ming metr kub) talon-toroj qilinishi natijasida davlat manfaatlariga jami 234 milliard 778 million so‘mlik zarar yetkazilgan.

Shuningdek, iste’molchilar tomonidan energiya resurslaridan foydalanish qoidalarini buzish bilan bog‘liq huquqbuzarlik bo‘yicha 304 ta ma’muriy ish rasmiylashtirilgan. Xususan, o‘tkazilgan nazorat tadbirlarida aniqlangan holatlarning 412 tasi elektr energiyasi, 63 tasi esa tabiiy gazdan foydalanishda qoidabuzarlikka yo‘l qo‘yilgani ma’lum bo‘lgan.

Qoidabuzar iste’molchilarga nisbatan belgilangan tartibda choralar ko‘rilib, tegishli hujjatlar huquqni muhofaza etuvchi organlarga taqdim qilingan.

Aprel boshlarida Surxondaryo viloyatining Denov, Qashqadaryo viloyatining Muborak hamda Farg‘ona viloyatining Marg‘ilon shahrida gazdan noqonuniy foydalanish holatlari fosh etilgan, Andijonda 1,3 mlrd so‘mlik elektr energiyasidan noqonuniy foydalangan ishlab chiqarish sexi aniqlangani to‘g‘risida xabar berilgan edi. “Zamin” yangiliklarini “Vkontakti”da kuzatib boring