20:30 / 22.09.2024

Gulistonga Xitoydan 8 ta yangi avtobus olib kelindi

^{Foto: Sirdaryo viloyati hokimligi matbuot xizmati}
Sirdaryo viloyatining Guliston shahriga Xitoydan 8 ta zamonaviy avtobus olib kelindi. Bu haqda viloyat hokimligi matbuot xizmati xabar berdi.

Yil yakuniga qadar viloyatdagi jamoat transporti parklari 40 ta yangi avtobuslar bilan to‘ldirilishi rejalashtirilgan.

^{Foto: Sirdaryo viloyati hokimligi matbuot xizmati}
Dastlabki bosqichda Xitoyning Yutong Bus kompaniyasida ishlab chiqarilgan 8 ta ekologik toza, har tomonlama qulay va zamonaviy bo‘lgan ZK6890HG rusumli yangi avtobuslar olib kelindi.

^{Foto: Sirdaryo viloyati hokimligi matbuot xizmati}
26 o‘rindiqli yangi jamoat transporti iqlimga mos sovitish va isitish vositalari, shuningdek, GPS tizimi hamda maxsus videokuzatuv kameralari bilan jihozlangan. Salonda elektron to‘lov tizimini amalga oshirish qurilmasi ishlaydi.

^{Foto: Sirdaryo viloyati hokimligi matbuot xizmati}
Avtobuslarning viloyat markazidagi yo‘lovchilar oqimi yuqori bo‘lgan, shuningdek, bir qator yangi yo‘nalishlarda qatnovi yo‘lga qo‘yiladi.

Avvalroq Namanganga Xitoyning Yutong kompaniyasi tomonidan ishlab chiqarilgan 36 ta zamonaviy avtobus olib kelingandi.

2023 yilning dekabr oyida Samarqandga Xitoydan 10 ta yangi avtobus olib kelindi.

2024 yilda Xitoy Eksimbanki Transport vazirligiga tabiiy gazda harakatlanuvchi ming dona avtobus hamda “Toshshahartransxizmat” korxonasiga 200 dona elektrobus xaridi uchun jami 180 million dollar miqdorida qarz mablag‘lari ajratishi to‘g‘risida, joriy yil davomida O‘zbekiston hududlari jamoat transporti uchun 2 ming dona avtobus va 2 ming dona mikroavtobus xarid qilinishi haqida xabar berilgandi.