Mutaxassis fikri: samolyotning qaysi qismidagi oʻrindiqlar eng xavfsiz?

^{Foto: iStock}
Joriy yil 25 dekabr kuni Bokudan Grozniyga uchayotgan Embraer 190 yoʻlovchi samolyoti Qozogʻistonning Oqtov shahrida qulab tushdi. Bu dahshatli fojia sabablarini oʻrganish hali ham davom etayotgan boʻlsa-da, mazkur aviahalokat hattoki eng ishonchli transport turlaridan biri boʻlgan samolyotda ham xavfsizlik masalasi juda muhim ekanligini yodga soldi.

Afsuski, yoʻlovchilar samolyot bortida yoki ish tizimida biror kor hol yuzaga kelishining oldini ololmaydi, ammo samolyotda eng xavfsiz oʻrindiqlarni tanlash orqali oʻlim xavfini kamaytirish imkoniga ega boʻladi. Quyida Travel Leisure ma'lumotlariga asoslanib samolyot xavfsizlik qoidalari haqida ma'lumot beramiz.

Samolyotning qaysi qismi xavfsizroq?

^{Foto: iStock}
Mutaxassislarning fikricha, bortdagi eng xavfsiz joy samolyotning orqa tomondagi uchdan bir qismidir. AQSh Fuqarolik Aviatsiya boshqarmasi (FAA) ning 35 yillik ma'lumotlariga asoslangan tadqiqotga koʻra, ushbu qismdagi oʻlim xavfi 32 foizni tashkil etadi. Taqqoslash uchun, oʻrta qismda bu koʻrsatkich 38 foizga, old qismida esa 39 foizga oshadi.

Samolyot orqa tomoni, uchdan bir qismidagi eng markaziy oʻrindiqlar xavfsizlik jihatdan alohida ajralib turadi (toʻq yashil rangda belgilangan) Bu tomonda oʻlim koʻrsatkichi oʻrtacha 28 foizni tashkil qiladi. Samolyotning oʻrta qismdagi oʻrindiqlar esa eng xavfli deb topildi, ularning oʻlimga olib kelish xavfi oʻrtacha 44 foizdir.

Samolyot bortida omon qolish imkoniyatini oshirishning yana bir varianti bor: buning uchun favqulodda chiqish joyi yaqinidagi oʻrindiqlarni tanlash kerak. Qoidaga koʻra, favqulodda hodisalarda samolyot 90 soniya ichida toʻliq evakuatsiya qilinishi kerak. 100 dan ortiq aviahalokatlar tahlili ushbu ma'lumotni tasdiqlaydi.

^{Foto: Massivelive}
Istisno holatlar

Barcha statistik ma'lumotlar shu vaqtgacha boʻlib oʻtgan voqealar haqidagi ma'lumotlar asosida umumlashtiradi, lekin istisno vaziyatlar ham mavjud. Masalan, 1989 yilda United Airlines 232 reysi halokatga uchraganida, tirik qolganlarning aksariyati samolyotning oʻrta qismida boʻlgan:

^{Foto: SFGATE}
1977 yilda Tenerife fojiasida 61 nafar tirik qolganlar asosan old oʻrindiqlarda boʻlgan. Bunday misollar favqulodda vaziyatlar doimo farq qilishi mumkinligini bildiradi.

Xavfsizlik boʻyicha tavsiyalar

Parvoz paytida xavfsizlikni ta'minlash uchun quyidagi oddiy tavsiyalarga amal qilish lozim:

• Styuardessalarning barcha koʻrsatmalarini doimo diqqat bilan tinglang va evakuatsiya paytida hech qachon buyumlaringizni olishga urinmang. Halokat paytida asosiy maqsad samolyotni imkon qadar tezroq tark etishdir;
  
• Old oʻrindiq choʻntagida joylashgan xavfsizlik haqidagi qoʻllanmani oldindan oʻqib chiqing;
  
• Favqulodda hodisada chiroqlar oʻchishi mumkin, shu sababli chiqish eshigidan to oʻrindiqqacha nechta qator borligini avvaldan sanab qoʻying.
  

“Zamin” yangiliklarini “Youtube”da kuzatib boring