Bosh prokuratura Komil Allamjonovni oʻldirish uchun yollangan shaxslar boʻyicha ma'lumot berdi

Avvalroq Komil Allamjonov va Dmitriy Lini oʻldirish uchun yollangan shaxslar – Bislan Rasaev hamda Shamil Temirxanov qidiruvga berilgani xabar qilingandi. Bosh prokuratura mazkur holat boʻyicha qoʻshimcha ma'lumot berdi.

Ma'lum qilinishicha, Bosh prokuratura tomonidan Komil Allamjonovga nisbatan sodir etilgan qotillikka suiqasd qilish bilan bogʻliq jinoyat ishi doirasida Rossiya fuqarolari Bislan Rasaev va Shamil Temirxanovlar qonunga xilof ravishda Oʻzbekistonga kirish va chiqish, jinoyat haqida xabar bermaslik hamda oʻqotar qurolning qonunga xilof muomalasi kabi jinoiy harakatlarni sodir etganliklari aniqlangan.

B.Rasaev va Sh.Temirxanovlar Jinoyat kodeksining tegishli moddalari bilan sirtdan ayblanuvchi tariqasida jalb qilinib, ularga nisbatan qamoqqa olish tarzidagi ehtiyot chorasi qoʻllangan holda qidiruv e'lon qilingan.

Komil Allamjonovga uyushtirilgan suiqasd

26 oktyabr tunda Prezident administratsiyasi Axborot siyosati departamenti sobiq rahbari Komil Allamjonovga qurolli hujum uyushtirilgani haqida xabarlar tarqaldi. Bosh prokuratura bergan ma'lumotga koʻra, fuqaro S.S. boshqaruvidagi Range Rover rusumli avtomashina Qibray tumani, Ifor koʻchasi boʻylab harakatlangan vaqtida ikki nafar noma'lum shaxs mashinaga oʻqotar quroldan bir necha marotaba oʻq uzib, noma'lum tomonga yashiringan.

Holat yuzasidan Jinoyat kodeksining 25, 97-moddasi (qasddan odam oʻldirishga suiqasd qilish) bilan jinoyat ishi qoʻzgʻatildi. Ma'lumot uchun, ushbu holatda jinoyat sodir etgan shaxslar 15 yildan 25 yilgacha boʻlgan muddatda ozodlikdan mahrum qilish orqali jazolanishi mumkin.

27 oktyabr kuni ushbu jinoyatni sodir etgan shaxslarning biri aniqlanib, gumonlanuvchi tariqasida ushlandi. 28 oktyabr kuni yana uch nafar gumonlanuvchi ushlandi. Noyabr oyida esa suiqasdda gumonlanib yana 5 kishi qamoqqa olingan.

Komil Allamjonov 2024 yil 30 sentyabrda Prezident administratsiyasi Axborot siyosati departamentining rahbari lavozimini tark etgan edi. U faoliyatini xususiy sektorda davom ettirishini ma'lum qilgan. “Zamin” yangiliklarini “Telegram”da kuzatib boring