00:07 / 21.01.2025

Toshkentda haydovchilik guvohnomasini qanday olish mumkin?

Haydovchilik maktabiga qanday hujjatlarni olib borish kerak? Imtihon topshirish qancha turadi va birinchi martada imtihondan oʻtilmasa, nima qilish kerak? Guvohnomani qayerdan olish mumkin?

Toshkentda har yili oʻz shaxsiy avtomobilida harakatlanishni xohlovchilar soni oshib bormoqda. Biroq oʻqish va haydovchilik guvohnomasini olish oson emas (va arzon ham emas). 20 yanvardan Yagona imtihon markazida imtihon topshirish narxi oshirildi. Biz tayyorlagan infografikada yengil avtomobillar haydovchilari uchun yangilangan narxlar bilan qoʻllanma keltirilgan.

Haydovchilik maktabini tanlashga jiddiy yondashish zarur. Maktab xususiy yoki davlatga qarashli boʻlishi mumkin. Uning Oʻzbekiston IIV YHXX tomonidan akkreditatsiya qilingan va tegishli litsenziyalarga ega boʻlishi muhim. Keyingi oʻrinda narx masalasi boʻlib, u juda katta farq qiladi va hozirda 8-10 million soʻmga etadi.

2022 yildan boshlab Toshkent aholisi haydovchilik guvohnomasini olish uchun nazariy va amaliy imtihonlarni faqat Yagona imtihon markazida topshirishi mumkin.

Bu erda imtihonlar inson aralashuvisiz avtomatlashtirilgan elektron tizim orqali oʻtkazilishi va baholanishi bilan ajralib turadi.

Agar nomzod 25 daqiqa ichida 18 tadan ortiq savolga javob bersa, u keyingi bosqichga – amaliy testga oʻtishi mumkin boʻladi. Bu erda avtodromda yoʻl harakati qoidalarini bilishini namoyish qilish kerak boʻladi, barcha xatolar maxsus sensorlar va uskunalar orqali qayd etiladi.

Yagona imtihon markazida nazariy imtihonni birinchi marta topshirish narxi — 1 mln soʻm, amaliy imtihon narxi — yana 1 mln soʻmni tashkil etadi.

Agar siz birinchi marta imtihonlardan oʻta olmagan boʻlsangiz, 7 kundan keyin qayta topshirishingiz mumkin. Ikkinchi va keyingi urinishlar – har bir imtihon uchun 1,2 mln soʻm.

Shuningdek, Yagona imtihon markazida maxsus kurslardan oʻtish mumkin (bu haydovchilik maktabining oʻrnini bosmaydi, lekin imtihonlarga tayyorlanishga yordam beradi). Nazariy bilimlar boʻyicha ekspress-kurs (guruhda, 5 kunlik, har kuni 3 soat) 1,5 mln soʻm, amaliyot boʻyicha (instruktor bilan 10 individual mashgʻulot) esa 1 mln 950 ming soʻm.

Imtihonlarni muvaffaqiyatli topshirganlarga sertifikatlar beriladi, ular haydovchilik guvohnomasini rasmiylashtirish uchun 1 yil davomida asos boʻladi.